O BNG pídelles ás direccións do PP e do PSOE que tomen medidas, dentro dos seus respectivos partidos, cos imputados na trama Pokemon

Abraira pediulle á cidadanía “que cando vaian a votar teñan en conta o que está pasando” por que “ese é momento no que a xente ten a súa responsabilidade”

Lugo, a 3 de febreiro de 2014. O BNG de Lugo, ante o levantamento parcial do segredo de sumario da operación Pokemon, pediu unha vez máis a dimisión do alcalde pola súa imputación xudicial. Abraira lembrou que o BNG xa abandonara, no seu momento, o goberno municipal pedindo a demisión de López Orozco pola súa imputación nesta trama de corrupción. A voceira nacionalista pediu axilidade á xustiza para aclarar cales son as reponsabilidades de cada quen e dixo que “as acusacións sobre o alcalde son graves e importantes”.

Paz Abraira dixo que “Orozco é responsábel por acción ou por omisión”. A voceira do BNG sinalou que será o xulgado o que teña que determinar as responsabilidades por acción pero Orozco debe de presentar a súa dimisión polas responsabilidades por omisión, políticas, evidentes xa que “quen foi a súa man dereita no goberno do concello durante moitísimos anos tecía e destecía a seu gusto primeiro no concello de Lugo e posteriormente na CHMS”. Abraira afirmou que “ningunha persoa sobre a que pesen acusacións deste tipo pode seguir á fronte dun goberno”. O BNG insiste na necesidade de que o actual alcalde presente a súa dimisión e no caso de non facelo para que o seu partido e seu secretario xeral, o sr. Besteiro, adopte as medidas necesarias para que o Orozco non siga ao fronte do goberno desta cidade.

Neste momento o concello de Lugo “está totalmente desatendido” e Paz Abraira sinalou que “o PSOE está máis preocupado das imputacións que pesan sobre o seu alcalde que en atender o goberno dun concello, no que gobernan en minoría”. Para o BNG este tipo de tramas de corrupción están a ter un efecto debastador sobre o concello de Lugo e ten efectos moi negativos sobre os veciños e veciñas que están a sufrir o desgoberno do seu concello.

A edil nacionalista lembrou que no BNG calquera cargo que resulta imputado presenta a súa dimisión inmediata, independentemente de que se salvagarde a súa presunción de inocencia. Abraira pediulle á cidadanía “que cando vaian a votar teñan en conta o que está pasando” por que “ese é momento no que a xente ten a súa responsabilidade” por que para o BNG “serán finalmente os cidadáns quenes terán que valorar estas cuestións cando vaian depositar o seu voto en calquera proceso electoral”.

Altos cargos do PP de Lugo, Santiago e Coruña

Abraira referiuse tamén ás implicacións de altos cargos do partido popular en Lugo, que aparecen nomeados no sumario e que, "ao parecer tamén mantiveron xuntanzas cos responsables das empresas desta trama". Tanto o voceiro municipal do PP no concello de Lugo, Jaime Castiñeira, como o presidente provincial do populares, X. Manuel Barreiro, aparecen entre os investigados nesta trama por manter contactos con reponsábles das empresas implicadas. Abraira afirmou que “o papel dos partidos estatais, tanto PP como PSOE, é moi semellante na súa resposta ante este entramado”. Abraira pediulle tamén “responsabilidade ao PP por que o que pide no concello de Lugo non o pide en Santiago nin en Coruña onde existen tramas, polo menos, tan importantes como a de Lugo”.