Dende a Central Intersindical Galega, amparándose no regulamento de participación cidadá, solicitaran poder intervir para presentar unha proposición pedindo apoio da corporación a ILP que levarán ao Parlamento Galego con medidas para a creación de emprego

Paz Abraira criticou esta decisión xa que “onte aprobouse por unanimidade no parlamento unha norma iniciativa do BNG para facilitar a presentación das ILP e favorecer a participación da xente mentres que no concello de Lugo PP e PSOE parece que van na dirección contraria”

Lugo, 27 de febreiro, 2013. A voceira do grupo municipal do BNG, Paz Abraira, compareceu hoxe co secretario comarcal da CIG, Antonio Niño, para denunciar o acordo tomado entre PP e PSOE que impede a intervención dos representantes da CIG no pleno municipal do vindeiro luns.  O BNG levará ao pleno da corporación unha iniciativa da CIG na que se solicitará dos grupos políticos o apoio ao texto da Iniciativa Lexislativa Popular na que se lle propón á Xunta a implantación de medidas para a creación de emprego en Galiza. Segundo explicou Paz Abraira “a CIG presentoulle esta iniciativa a todos os grupos políticos e foi o BNG quen amosou interese por trasladala ao pleno” e engadiu que “foi a CIG, a posteriori, quen solicitou intervir no pleno para facer unha exposición da proposición”.

A voceira do BNG explicou que o concello de Lugo tiña por norma “permitir que aqueles colectivos que se sentisen afectados por un asunto tratado no pleno puideran intervir” e sinalou que “tamén é verdade que houbo un acordo dos tres grupos para ir analizando cada caso”. O BNG entende que “é necesario regular a participación da sociedade nos plenos” mais “resulta incomprensible que PP e PSOE non admitisen a solicitude da CIG xa que se lles deu entrada, no pleno, a moitos colectivos para defender aquelo que consideraban xusto”. O BNG defende que a CIG ten dereito a intervir no pleno do luns. “Non se pode utilizar a norma contra para impedir que se exprese unha demanda social e sindical tan xusta e necesaria” dixo a voceira do BNG.

Abraira sinalou que “o PP estase a curar en saúde por que Jaime Castiñeira está no grupo parlamentario do PP e alí vai ter que tomar unha posición” e engadiu que “utilizan como excusa un regulamento no que sempre se deu participación a todo o mundo”. Neste momento, dixo Paz Abraira “a sociedade está reclamando que se lle de participación de xeito directo en todas as institucións”. O BNG manifestou o seu rexeitamento á decisión do PP e do PSOE.

Pola súa banda o representante da CIG, Antonio Niño, dixo que “é posible que ideario político do PP e do PSOE choque bastante coas propostas da CIG xa que non coincidimos co modelo neoliberal que eles implantan alá onde gobernan”. Niño engadiu que “a CIG propón medidas alternativas para crear un modelo económico baseado nos sectores produtivos do país”. Niño dixo que “o BNG, en todo caso, vai defender esta iniciativa no pleno e dende a CIG agardamos o apoio dos outros grupos para a aprobación da iniciativa”.

Máis de 2.000 sinaturas

O secretario comarcal da CIG cualificou de “visión sesgada do regulamento” o argumento utilizado polo voceiros de PP e PSOE para impedir a intervención dos representantes da central nacionalista no pleno do concello de Lugo. Antonio Niño lembrou que a CIG xa recolleu, na cidade de Lugo, máis de 2.000 sinaturas para abalar a ILP que pretenden levar ao parlamento galego e que, ademais, a central intersindical representa a milleiros de traballadores e traballadoras en Lugo e na súa provincia. Para a CIG “é unha actitude pouco democrática” e seu secretario comarcal dixo que “non quero pensar que PP e PSOE non compartan con nos a preocupación polo fondo do problema que se debate con esta ILP”.