O BNG – Asembleas Abertas defenderá no pleno do concello de Lugo unha moción pedindo un plan, para a mellora e mantemento de todo o tramo do Camiño Primitivo ao seu paso polo Concello de Lugo

Ademais os nacionalistas  pedirán que se estude a posibilidade de levar adiante peonalizacións nalgúns dos tramos do Camiño Primitivo polos que circula o tráfico rodado, como poida ser o caso da Calzada da Ponte.                                               

Lugo, 22 de xullo 2015. O BNG – Asembleas Abertas defenderán no próximo pleno do concello de Lugo unha moción na que se propón que o concello de Lugo elabore un plan, para a mellora e mantemento de todo o tramo do Camiño Primitivo ao seu paso polo Concello de Lugo. Ademais, Rubén Arroxo, explicou que “tamén é necesario que se estude a posibilidade de levar adiante peonalizacións nalgúns dos tramos do Camiño Primitivo polos que circula o tráfico rodado, como poida ser o caso da Calzada da Ponte”.

Arroxo lembrou que “o Camiño Primitivo, recentemente declarado Patrimonio da Humanidade, dálle a Lugo un potencial turístico e por tanto económico que non podemos obviar” e engadiu que “o estado actual desta ruta ao seu paso polo casco urbano do Concello de Lugo é amplamente mellorable, co fin de darlle o valor minimamente esixible a este ben patrimonial”. A presenza da maleza que nalgunhas épocas chega prácticamente a cubrir o camiño no tramo que vai polo barrio do Carme, as pintadas nas paredes, a vexetación expontanea nas beirarúas, amosan unha clara sensación de abandono.

O BNG – Asambleas Abertas súmase á reclamación de moitos veciños e veciñas que reivindican dende fai tempo que se lle dea unha solución ao tráfico rodado na Calzada da Ponte. Arroxo sinalou que “o pleno do concello xa aprobou no pleno de outubro pasado ano unha iniciativa para o adecentamento desta parte do camiño primitivo e para que se regulara o tráfico desta vía”. Para o voceiro naciónalista “cómpre tamén ter en conta que é a vía de conexión entre os dous elementos máis significativos da nosa cidade, a Muralla e o río Miño, e tamén o principal acceso desde a cidade á restaurada Ponte Romana”

En relación á Calza Romana, Arroxo, sinalou que “a día de hoxe obsérvase saturada de vehículos mal aparcados que dificultan o paso de peóns e peregrinos, a maiores da circulación de vehículos como acceso á N-VI dende a Volta da Viña”.