Rubén Arroxo anunciou que levarán á comisión de infraestruturas unha iniciativa para que o Goberno Municipal aclare as súas intencións sobre o mantemento deste servizo

“Retirarlles competencias aos operarios municipais e entregárllelas á unha empresa privada, esto é o que está a suceder no concello” denunciou Rubén Arroxo

Lugo, 30 de novembro de 2015. O voceiro municipal do BNG – Asembleas Abertas no concello de Lugo anunciou que presentarán unha serie de preguntas na comisión de infraestruturas para que o Goberno Municipal aclare as súas intencións sobre o mantemento dos servizos electro-mecánicos do concello. Arroxo informou de que “neste momento unicamente dous operarios están a traballar neste servizo, cando chegou a ter ata 17 traballadores”.

Rubén Arroxo explicou que non se están a cubrir as baixas de traballadores e que o goberno municipal tampouco deu pasos para cubrir as prazas que quedaron vacantes no servizo. “Estamos ante un novo proceso de abandono dun servizo público municipal, mentres se están a desviar os cartos dos lucenses para incrementar os beneficios dunha empresa concesionaria” dixo Rubén Arroxo.

Arroxo explicou que dende o goberno municipal se están a entregar competencias, que eran propias dos servizos municipais, a empresas externas e deixase morrer o servizo municipal ao igual que ocurriu en outros servizos municipais que remataron por privatizarse. “A falta de dirección deste servizo, por parte do goberno, provoca situacións absolutamente inexplicables que repercuten negativamente no funcionamento do propio servizo e nas arcas municipais” dixo Arroxo.

Unha grúa que se contrata e a municipal está parada

Rubén Arroxo incidiu na necesidade dun maior control dos recursos municipais xa que “dase o caso de que se está a contratar o servizo da grúa con cesta a unha empresa privada mentres o vehículo municipal que ten esta mesma equipación permanece parado no garaxe”. “Queremos saber se este tipo de contratacións supón un incremento de gasto para o concello ou que tipo de relacións existen entre a empresa que presta o servizo e os responsables das contratacións” dixo Rubén Arroxo.