Lugo, 08 de xullo de 2026. Rubén Arroxo, portavoz do BNG no Concello de Lugo, anunciou que rexistrará unha pregunta dirixida ao goberno municipal para coñecer se está a funcionar igual que outros anos o servizo de socorrismo na contorna do río durante a tempada estival, un servizo que, segundo sinalan, "veuse prestando nos últimos anos e do que, a día de hoxe, non existe información pública", dixo o portavoz municipal do BNG, Rubén Arroxo. O BNG lembrou que este servizo “é fundamental para garantir a seguridade das persoas que utilizan estes espazos naturais durante o verán” e criticou a falta de previsión do executivo local. “Trátase dun servizo que se leva prestando anos e do que, malia estar xa dentro da tempada de verán, a veciñanza que baixa ao río segue a trasladarnos que non se está a prestar”, afirmou.

Arroxo incidiu en que, aínda que a zona non conta cun acceso formalizado, “moitas veciñas e veciños acoden igualmente ao río para refrescarse, especialmente nos días de altas temperaturas”, polo que considera imprescindible a presenza de persoal cualificado que poida actuar en caso de emerxencia. O BNG destaca que a ausencia deste servizo supón un risco innecesario e reclama ao goberno municipal que actúe con responsabilidade e adopte medidas urxentes para garantir a seguridade na contorna".

O portavoz BNG afirmou que "estamos a ver un novo exemplo claro da improvisación do goberno: primeiro minten co acceso fixo ao río, que se tivo que retirar, e agora non prestan un servizo básico para todas e todos os lucenses que desfrutan a diario do río". O BNG critica que o goberno local do PP "non ten proxecto para Lugo e este é un exemplo máis da súa incapacidade para que a cidade siga a mellorar".