Lugo, 26 de novembro de 2025. O BNG realizou esta tarde unha acción reivindicativa no adarve da Muralla para reclamar á Xunta de Galiza que garanta o bo estado do alumeado ornamental. Arroxo afirmou que "este domingo celebramos o 25 aniversario da declaración da Muralla como Patrimonio da Humanidade e seguimos a ver 106 luminarias do adarve apagadas, a pesares de que moitas persoas fan uso deste espazo durante a noite". No acto, o BNG propuxo de xeito irónico á Xunta que instale candeas se non son capaces de facer funcionar o alumeado ornamental na semana do 25º aniversario da Muralla como Patrimonio da Humanidade.

Rubén Arroxo afirmou que este alumeado é necesario durante todo o ano, e fixo fincapé en que esta é a semana máis importante para a Muralla, debido á celebración do Patrimonio da Humanidade. Segundo Arroxo, a Xunta de Galiza "ten que poñer en valor a Muralla, que representa non só un ben histórico senón tamén un gran recurso turístico e cultural, ao ser a única muralla romana que se conserva completa".

"Lugo está a traballar en poñer en valor o monumento máis importante da cidade, mentres que a Xunta de Galiza, como responsable do seu mantemento, deixa de lado o mantemento do alumeado da Muralla". O portavoz do BNG afirmou que "este é un novo exemplo da discriminación da Xunta a Lugo", e afirmou que "a falta de mantemento da Muralla únese ao olvido ao que ano tras ano nos somenten nos orzamentos ou á ínfima colaboración da Xunta de Galiza con outro dos eventos máis importantes da cidade, as festas do San Froilán".