ARROXO REFERIUSE Á PUBLICACIÓN NO BOP DUN ANUNCIO “PARA ALGO TOTAL ABSTRACTO” SOBRE A REDACCIÓN DE 7 ORDENANZAS FUNDAMENTAIS DO CONCELLO

“O goberno ignora á oposición e menospreza a intelixencia da veciñanza de Lugo” dixo Rubén Arroxo

IMG_20161216_130142

“A transparencia e a participación non consiste en poñer á disposición dos lucenses un correo electrónico para que opinen sobre algo que non existe” afirmou Arroxo

“O goberno ignora á oposición e menospreza a intelixencia da veciñanza de Lugo” dixo Rubén Arroxo
Lugo, 19 de xaneiro 2017. O voceiro do BNG – AA no concello de Lugo, Rubén Arroxo, acusou ao goberno municipal de “ignorar aos grupos da oposición e menosprezar a intelixencia da veciñanza de Lugo”. Arroxo informou que o pasado 9 de xaneiro foi publicado no BOP un anuncio do Concello de Lugo “para algo total abstracto” sobre a redacción de 7 ordenanzas fundamentais do concello. “Non sabemos o que pretende o goberno municipal con este tipo de anuncios nos que pretende que a xente opine sen que exista un documento base nen un proceso regulado para ter en conta todas as achegas” dixo Arroxo.

O voceiro nacionalista sinalou que “asistimos unha vez máis a un desprezo polo grupos políticos que conformamos a corporación municipal, xa que non nos convocaron para coñecer o noso posicionamento, nin se nos comunicou a intención de abordara a elaboración e modificación destas ordenanzas”. O anuncio publicado no BOP explicita que se trata dun proceso de caracter previo á elaboración do proxecto das seguintes ordenanzas:

- Ordenanza de Xestión e Uso de Hortos Urbáns

- Ordenanza de Protección contra a Contaminación Acústica

- Ordenanza de Licenzas e Comunicación previas

- Ordenanza Única de Actividades

- Ordenanza de Publicidade Exterior

- Ordenanza reguladora da igualdade e discriminación na publicidade exterior

- Regulamento de Participación Cidadá.

 

Para o BNG-AA “a falta de rigor do goberno municipal queda patente no feito de que separan en dous apartados relativos á Publicidade Exterior, aspectos que deben ir recollidos nunha única ordenanza. Ademais Rubén Arroxo significou que “hai sectores, como o hostaleiro, que se verán seriamente afectados por ordenanzas como a de Contaminación Acústica ou a de Publicidade Exterior na que haberá que contar con todos os axentes implicados”.

Arroxo criticou tamén o curto periodo de tempo que se facilita para facer achegas, que é de 15 hábiles, “non entendemos por que se limita este tipo de achegas xa que o proceso que se anuncia non é un prazo formal de alegacións”. Arroxo reclamou que se dea a debida publicidade “cando se vaia a iniciar un proceso serio de redacción” e lembrou que “algunha destas ordenanzas xa foron iniciadas por anteriores gobernos socialistas e quedaron paradas nun caixón como outras moitas cuestións neste concello”. Arroxo anunciou que o BNG – AA trasladará polos seus propios medios información aos colectivos afectados para que sexan coñecedores deste proceso de aparente participación.

Enlace BOP:

http://www.deputacionlugo.org/portal_localweb_ag/RecursosWeb/DOCUMENTOS/1/0_15140_1.pdf#page=7

“O goberno ignora á oposición e menospreza a intelixencia da veciñanza de Lugo” dixo Rubén Arroxo