Lugo, 14 de marzo de 2025. A deputada no Parlamento Galego polo BNG, Montse Valcárcel, afirmou que a Xunta de Galiza, gobernada polo PP "demostra cada día que non ten un proxecto claro para Lugo". Valcárcel fixo esta afirmación despois de que no pleno desta semana o conselleiro Diego Calvo defendera a conexión por bus da cidade de Lugo cun centro comercial ubicado na Coruña, "unha medida que afecta directamente ao pequeno comercio de Lugo, especialmente ao ubicado no centro da cidade", afirmou Valcárcel.

A deputada do BNG reafirmouse na defensa do comercio local lucense, e afirmou que esta medida é "un dos maiores ataques que se lle pode facer ao comercio local" e "algo totalmente surrealista". O BNG critica que a política da Xunta sexa esta, mentres tamén reducen o servizo de transporte a demanda para persoas con mobilidade reducida, un servizo que foi implementado cando o BNG gobernaba na Xunta de Galiza.

Valcárcel afirmou que "a Xunta só ten dous tipos de medidas para Lugo, os conselleiros do PP veñen á nosa cidade ou a presentar propostas surrealistas como un bus a un centro comercial ou a vender como grandes novidades proxectos paralizados desde a chegada do PP en 2009", en referencia á visita da conselleira de Vivenda esta semana para anunciar un novo concurso de ideas para o Pazo de Dona urraca, concurso que xa se celebrou durante a etapa de goberno do BNG na Xunta e que ao chegar o PP "foi paralizado, tendo que malgastar cartos públicos en indemnizar á empresa adxudicataria do proxecto".