Lugo, 18 de novembro de 2016. A parlamentaria do BNG por Lugo, Olalla Rodil, e a edil do BNG - Asembleas Abertas no concello de Lugo, Maite Ferreiro, rexistraron unha solicitude ante o novo xefe territorial da Xunta de Galiza para solicitar unha visita ao edificio do novo auditorio de Lugo. “Agardamos que o sr. Balseiro demostre unha actitude diferente e permita coñecer este edificio ás persoas que traballan pola cultura en Lugo” afirmou Olalla Rodil e lembrou que en abril houbo unha visita do presidente da Xunta á que somentes asistiron representantes de institucións, do PP e do PSOE.
Pola súa banda, Maite Ferreiro lembrou que no pleno municipal do mes de abril aprobouse, por unanimidade, unha iniciativa do BNG na que se pedía que se convidara a visitar a persoas e colectivos vencellados ao mundo da cultura. Ferreiro explicou que “queremos que o propio concello de Lugo promova ou inste á Xunta de Galiza a facer unha xuntanza e posterior visita cos colectivos e entidades lucenses que traballan no eido da cultura, para dar a coñecer as características do novo auditorio e as dotacións que posúe neste momento para que toda a xente que traballa pola cultura poida coñecer esta nova dotación”.

O pasado 20 de abril o presidente da Xunta, acompañado da alcaldesa e de varios ediles do partido popular e do PSOE, visitaron o novo edificio do auditorio. A esta visita non foron convidadas outras institucións, entidades e colectivos que traballan na cultura e pola cultura neste concello e nesta provincia. Tampouco foron convidados os grupos políticos elixidos polas veciñas e veciños de Lugo para representalos nesta corporación municipal. “O edificio do novo auditorio de Lugo está practicamente rematado 12 anos despois de que o anterior alcalde de Lugo e quen agora é presidente da Xunta de Galiza asinaran un convenio para a construción dun auditorio na cidade de Lugo, pero sigue pechado á cidade” dixo a parlamentaria do BNG-AA.

Os nacionalistas reclaman, tamén, que o goberno municipal, dacordo co departamento correspondente da Xunta de Galiza, analicen e definan o equipamento necesario para permitir a apertura do novo auditorio e, unha vez definido, se traslade esta información ós colectivos e entidades culturais da cidade para contrastar a súa idoneidade. “É necesario que se establezan os necesarios cauces de comunicación entre o concello de Lugo e o tecido asociativo para analizar como se vai se vai a realizar a xestión dos novos espazos culturais dependentes do concello de Lugo” concluíu Ferreiro e engadiu “tanto o proxecto desta obra, como o desenvolvemento das obras, estiveron sempre rodeados dun absoluto escurantismo que impediu coñecer cal ían ser os contidos deste edificio,  a distribución de espazos e a finalidade de uso do mesmo”