Lugo, 23 de xaneiro de 2025. "Malia que non foi renovado o decreto do estado que permitía os descontos en transporte publico, os buses urbanos de Lugo non se van ver afectados, e continuarán a ser os máis baratos de Galiza e os terceiros máis económicos de todo o Estado". Así o anunciou Rubén Arroxo, Tenente Alcalde do Concello de Lugo e responsable da área de Mobilidade, quen destacou o compromiso do goberno local por manter un transporte accesible e sostible para a cidadanía.

"En Lugo queremos que o transporte urbano siga sendo unha opción cómoda e accesible para todas as persoas, e manter as tarifas actuais é unha prioridade dado que o bus urbano é unha ferramenta clave para mellorar a mobilidade e a calidade de vida na nosa cidade", sinalou Arroxo.

O Tenente Alcalde aproveitou para lembrar que o 2024 foi un ano histórico para o bus urbano, acadando o récord de persoas usuarias desde que se gardan rexistros. "O pasado ano expedíronse 2.219.312 billetes, unha cifra que confirma que cada vez máis veciñas e veciños optan por este medio de transporte. Isto demostra que as medidas postas en marcha polo Concello, como a reformulación das liñas, están a funcionar".

Rubén Arroxo animou á cidadanía a seguir apostando polo bus urbano como unha alternativa económica, práctica e sostible. "Queremos que Lugo sexa unha cidade cada vez máis accesible para as persoas, e iso pasa por promover o uso dun transporte público eficiente que, ademais, evita os problemas asociados ao tráfico e ao aparcamento".