“Lugo vive sumerxido nun atasco de tráfico e o goberno está estancado no seu propio atasco” dixo Rubén Arroxo

Os nacionalistas presentaron un escrito reclamando que a convocatoria da mesa da mobilidade se faga “no menor tempo posible”

Lugo, 8 de xaneiro de 2016. O portavoz municipal do BNG – Asembleas Abertas no concello de Lugo, Rubén Arroxo, rexistrou hoxe un escrito dirixido á alcaldesa para reclamar que “no menor tempo posible” se convoque a mesa da mobilidade. Arroxo lembrou que dende a súa  formación xa se fixeron diversas propostas de mellora na regulación do tráfico e a respecto de incrementar as zona peonís e reforzar o transporte público.

Arroxo sinalou que “dada a situación de colapso no tráfico de Lugo durante as últimas datas fica demostrada a necesidade de iniciar de inmediato un proceso de cara a apostar por unha nova mobilidade na zona urbana do Concello de Lugo”. Para o BNG – Asembleas Abertas “estes días demóstrase que o modelo de mobilidade actual está totalmente esgotado e hai que tomar medidas”.

Para o BNG – Asembleas Abertas “o que está a suceder estes días demostra que o actual modelo está esgotado e hai que sentarse para buscar solucións”. Arroxo lamentou a falta de iniciativa por parte do goberno municipal e puntualizou que  “Lugo vive sumerxido nun atasco de tráfico e o goberno está estancado no seu propio atasco”.