“Imos buscar todas as alternativas posibles para esixirlle ao goberno municipal que en setembro estean en funcionamento os comedores escolares” afirmou Rubén Arroxo

Lugo, 8 de xullo 2016. O BNG - AA vaille esixir ao goberno municipal que non paralice o servizo de comedores no curso que vén, o voceiro nacionalista, Rubén Arroxo, fixo as seguintes declaracións mentres presentaba unha batería de preguntas para a vindeira comisión municipal “Imos buscar todas as alternativas posibles para esixirlle ao goberno municipal que en setembro estean en funcionamento os comedores escolares”.  Dende o grupo nacionalista informaron de que existe unha importante preocupación entre as nais e pais dos alumnos dado que a opción que está a manexar o goberno municipal é a de que os comedores os xestionen as propias ANPA´s cando menos no primeiro trimestre. Para Rubén Arroxo esta non pode ser unha opción xa que considera que sería sobrecargar ás ANPA´s cunha responsabilidade e cun traballo que non lle corresponde “entendemos que hai que apostar por un concello que dea servizos básicos ás veciñas e veciños, e as solucións non poden pasar por cargar ás nais e pais cun traballo que non lles corresponde” afirmou Arroxo.

Dende o grupo municipal do BNG-AA tamén quixeron lembrar a responsabilidade da Xunta neste proceso “o que é inadmisible é  que Xunta e Concello se dediquen durante semanas a acusarse con este tema os uns aos outros, e mentres tanto o problema dos comedores segue sen solución”. En relación con isto o grupo nacionalista pediulles tanto a PP como a PSOE “que se deixen de facer precampaña para as autonómicas dende as súas respectivas institucións e se poñan a traballar dunha vez para darlle solución a isto”.

Rubén Arroxo tamén quixo lembrar que tanto na comparecencia do concelleiro delegado de educación, como o día que chegou esta cuestión por vez primeira ao pleno, o BNG esixiu que se solucionasen as irregularidades recoñecidas na forma de contratación, pero que non ían permitir que esa solución pasase por suspender o servizo. O nacionalista tamén expuxo que en Compostela se deu unha problemática semellante e o que se fixo foi primeiramente executar unha licitación de forma exclusiva do servizo de catering, algo para o que aínda habería tempo para facer en Lugo.