Representantes da Plataforma Preferentes de Lugo presentaron, co voceiro do BNG no concello de Lugo, a moción que se debaterá no vindeiro pleno municipal

Para o colectivo de afectados “a solución ao problema pasa por unha solución política”

LUGO, 15 de xaneiro de 2013. Tres representantes da Plataforma Preferentes Lugo presentaron a moción que o BNG trasladará ao Pleno Municipal do vindeiro día 4 de febreiro. Na rolda de prensa estiveron acompañados do voceiro nacionalista Antón Bao que dixo que “será a cuarta vez que o BNG leve ao pleno do concello unha proposta neste senso” e lembrou que “nas tres ocasións anteriores o partido popular votou en contras das iniciativas que pretendían un pronunciamento a favor da defensa dos afectados por esta estafa”.

Antón Bao cargou contra a actitude do partido popular que tamén levará unha moción, para tratar o tema das preferentes, ao mesmo pleno do concello de Lugo. O voceiro do BNG tachou de “hipocresía política absoluta” dado que “a proposta consiste en continuar envolvendo o problema, xa que a arbitraxe é unha solución parcial e oscurantísta”. Bao recriminou que a arbitraxe fora unha solución electoralista xa que antes das eleccións había 20 árbitros traballando e agoara quedaron 4. En referencia a moción dos populares Antón Bao dixo que “rResulta unha clara desvergonza solicitarlle ao Banco de España, FROB, Ministerio de Economía e Facenda ou á Comisión Europea, que reduza ou non se produzan as quitas cando a existencia das quitas é produto do Real Decreto Lei 24/2012, aprobado polo goberno do PP no Estado o pasado mes de xullo”.

O BNG participou nunha xuntanza, convocada a semana pasada pola Plataforma Preferentes Lugo, á que foron convidados voceiros e alcaldes de todos os grupos políticos dos concellos da comarca de Lugo. Nesta xuntanza os membros da Plataforma Preferentes Lugo entregaron a todos os participantes un texto para levar aos respectivos concellos unha moción en apoio ás persoas afectadas pola estafa. Segundo dixo Digna Lagarón, representante da plataforma, “solicitamos a implicación dos voceiros dos grupos políticos por que queremos coñecer cal é a súa posición ao respecto e somos sabedores de que a única solución pasa por unha decisión política”.

Dende a plataforma de afectados, Javier Novo, cifrou en 43.000 os afectados polas participacións preferentes en toda Galiza e en 35.000 os afectados polas subordinadas. Novo engadiu que “dende a plataforma somos totalmente contrarios á quita que, segundo as entidades, comenzarán a aplicarse a principios de febreiro”. Novo explicou, tamén, que é difícil coñecer o número exacto de persoas afectadas polas subordinadas xa que as entidades están a negarlles aos seus clientes que teñan este produto contratado e continuan a pagarlles uns xenerosos intereses alegando que son outro tipo de depósitos.

Novas mobilizacións

María Xosé Rodríguez, que tamén falou en nome da Plataforma Preferentes Lugo, anunciou que o colectivo mobilizarase en Lugo aproveitando a celebración do congreso do partido popular e convidou a toda a cidadanía a participar nestas mobilizacións que serán diante do Pazo de Feiras e Congresos de Lugo o sábado, 19 de xaneiro, ás 11:00 e o domingo, 20 de xaneiro, ás 12:00. Os representantes da plataforma tamén anunciaron unha manifestación, de todos os afecatados do país, para o día 2 de febreiro en Santiago de Compostela. Esta manifestación comenzará ás 11:30 horas e rematará diante da residencia oficial do presidente da Xunta.

TEXTO DA MOCIÓN PRESENTADA:

EXPOSICIÓN DE MOTIVOS

Presentado pola Plataforma Preferentes Lugo un escrito solicitando o pronunciamento deste concello en apoio á loita que as persoas afectadas polas participacións preferentes e obrigas subordinadas están levando a cabo para recuperar integramente os seus aforros, o BNG traslada esta solicitude para o seu debate plenario e que se adopten os seguintes

ACORDOS:

1. Instar ao Goberno do Estado Español a que arbitre os mecanismos legais necesarios para devolverlles a todos os aforradores o diñeiro depositado nas entidades de crédito baixo a fórmula de participacións preferentes ou capital subordinado.

2. Demandar da Xunta de Galiza que proceda a recorrer xudicialmente a proposta da quita que para estes produtos financeiros propón o Ministerio de Economía e a Comisión Europea.

3. Apoiar e participar activamente, con todos os medios ao seu alcance, nas concentracións, manifestacións e outros actos reivindicativos que as persoas afectadas a través da Plataforma Preferentes Lugo organicen na defensa dos seus dereitos e intereses.