“Non podemos permitir que estas obras arrasen outro elemento catalogado do noso patrimonio como ocurriu cos restos de Coeses” dixo Cristina Ferreiro

O BNG solicitará que se acondicione o entorno deste cruceiro situado na parroquia de Saa e que se proceda a súa restauración

Lugo, a 11 de setembro de 2014. O Bloque Nacionalista Galego denunciou a agresión sufrida polo cruceiro de Vilamoure de Abaixo, na parroquia de Saa, polas obras da autovía Lugo – Santiago. A edil nacionalista, Cristina Ferreiro, advertiu que se trata dun elemento catalogado como BIC e que conta cun entorno de protección que foi ignorado á hora de acometer as obras da autovía. Os nacionalistas solicitarán que se acondicione o entorno do cruceiro para dotalo dunha maior protección e que se acometa a súa restauración. Membros da asociación de veciños de Saa tamén manifestaron a súa preocupación polo estado do cruceiro e acompañaron á edil nacionalista na súa visita a Vilamoure.

“Estamos a tempo de evitar que as obras desta autovía se leven por diante outro elemento singular do noso patrimonio e hai unha boa oportunidade para contribuír á súa conservación e posta en valor” dixo Cristina Ferreiro. Ferreiro lembrou o acontecido cos achádegos arqueolóxicos que apareceron nestas mesmas obras na parroquia de Coses e dixo que “non podemos permitir que estas obras arrasen outro elemento catalogado do noso patrimonio como ocurriu cos restos de Coeses”. A cruz deste cruceiro foi mutilada, aínda que algunha das súas pezas permanecen caidas na base do propio cruceiro.

O Cruceiro de Vilamoure de Abaixo (parroquia de Saa) aparece catalogado como BIC e conta cun entorno de proteción definido no PXOM do concello de Lugo. Segundo a descrición feita no momento da súa catalogación está formado por unha base de catro peldaños, ten fuste octogonal sen ornamentación e un capitel moldurado. A cruz é de sección circular con un cristo na parte frontal e unha dolorosa na parte posterior.

O BNG presentará un rogo para que o goberno municipal adopte as medidas necesarias para protexer debidamente este elemento patrimonial. Ademais os nacionalistas solicitarán e que se acometa a súa restauración. Na ficha de catalogación de este BIC contémplanse como obras permitidas a consolidación, a conservación e a restauración. No propio documento de catalagoción di textualmente que “se permiten as obras destinadas á consolidación dos elementos constructivos do cruceiro, aconsellándose a reposición dos elementos característicos da tipoloxía orixinal que se perderan, deteriorase ou alterasen”.