Para o BNG “é un despropósito que se deixe a execución deste tipo de obras para a época de máis chuvias de ano”

A voceira do BNG criticou ao Goberno Municipal por non ter habilitado vías de acceso alternativas para os veciños de Orbazai “despois de que se lles advertira cando estaban a tempo de facelo”

Lugo, 16 de outubro 2014. O BNG presentou unha serie de preguntas dirixidas ao goberno municipal para clarificar as razóns dos retrasos na execución das obras da Ponte sobre o río Mera, na parroquia de Orbazai. A voceira do BNG no concello de Lugo sinalou que “unha vez iniciadas as obras de arranxo da ponte sobre o río Mera veciños e veciñas denuncian a escaseza de traballadores e os nulos avances da obra”. Os nacionalistas solicitarán información para saber cal é o estado de execución da obra sobre a Ponte do Mera, en Orbazai.

Outra das preocupacións veciñais, explicou Abraira “é saber se a adxudicataria vai cumprir os prazos de execución despois de que o goberno local demorara o comenzo das obras e deixara pasar o verán que sería a época propicia para acometer uns traballos deste tipo”. Paz Abraira lembrou que “as obras estaban previstas para o verán pero a incompetencia do goberno municipal do PSOE permitiu que chegaramos a esta sitación”.

Paz Abraira lembroulle ao concelleiro responsáble do medio rural que “en Lugo no outono e no inverno chove” e lamentou a “súa ineptitude e incapacidade” por non ter previsto esta circunstancia cando se planificou a execución das obras da ponte sobre o Mera. Abraira advertiu que esta mesma incapacidade “quedará demostrada cando non sexan capaces de executar todas as obras que o PSOE amañou co PP para facer un lavado de cara antes das eleccións municipais”.

Vías alternativas para os veciños

O BNG tamén demandou información para saber se o Goberno municipal vai adoptar algunha medida para garantir que o camiño que une a parroquia de Orbazai coa estrada de Santiago, na zona da Louzaneta, se vai poder usar durante estes meses. O arranxo deste camiño fora un compromiso, adquirido nunha comisión, do concelleiro de Medio Rural despois de que o BNG denunciara o mal estado desta vía de comunicación no pasado mes de setembro.