“Un alcade que avala e defende os crimes da alcaldía non pode seguir un minuto máis no seu cargo” dixo o voceiro do BNG en Baralla

O BNG anunciou que levará mocións a todos os concellos da provincia para pedir a dimisión do alcalde de Baralla

Baralla, 16 de agosto de 2013. O voceiro do BNG no concello de Baralla, Xosé Manuel Becerra, anunciou que os grupos da oposición na corporación municipal de Baralla veñen de presentar unha solicitude para a celebración dun pleno extraordinario que terá como único punto, na orde do día, a petición de dimisión do actual alcalde. Esta solicitude de dimisión ven motivada polas graves afirmacións que fixo González Capón no transcurso do último pleno muncipal nas que , dixo que “os que foron condenados a morte” durante o franquismo “será que lo merecían”. Xosé Manuel Becerra destacou que “a pesares da gravidade das súas afirmacións” González Capón aínda segue ostentado os cargos de alcalde de Barralla e deputado do provincial na Deputación de Lugo.

O voceiro municipal do BNG en Baralla, X. M. Becerra, lembrou en que esas afirmacións se realizaron no pleno do 26 de xullo e as desculpas non foron inmediatas nin moito menos, senón que se produciron dez días despois, circunstancia que pon en evidencia a falacia dos argumentos do Partido Popular. Para o BNG é “inadmisible que o PP non teña obrigado a dimitir a González Capón ” xa que, segundo Becerra “a gravidade dunha postura como a que evidenciou o alcalde de Baralla non permite que siga nun cargo institucional da democracia unha persoa que defende as actuacións dun rexime totalitario”.

Becerra argumentou que os grupos da oposición solicitaron a celebración deste pleno extraordinario “pola gravidade dos feitos e pola inacción dos responsábeis do partido popular que permiten que esta persoa continúe a ocupar cargos de representación do pobo, obtidos nun sistema democrático que nada ten que ver coa ideoloxía que reflexan as verbas de González Capón ”.

Mocións en todos os concellos da provincia

Esta mesma mañá responsábeis comarcais do BNG presentaron a moción que a formación nacionalista vai levar a todos os concellos da provincia para solicitar, ao Partido Popular, a destitución de Manuel González Capón tanto do seu cargo como alcalde de Baralla como do de deputado provincial e, ao mesmo tempo, amosar o apoio dos nacionalistas á rehabilitación pública das vítimas franquistas en cada concello. Para os nacionalistas estas afirmacións “constitúen un ataque a todas as vítimas do franquismo, que só na nosa provincia superan as 3.000 persoas, así como ás súas familias, ao que se suma a actitude lamentábel adoptada neste asunto polos dirixentes do Partido Popular de Lugo e de Galiza, posto que non é suficiente con que lamenten as súas declaracións, é preciso que o destitúan de todos os seus cargos”.