Rubén Arroxo manifestou a preocupación da candidatura que representa polas dificultades que teñen as persoas con capacidades diferentes para chegar ata as zonas de ocio

O candidato do BNG-Asambleas Abertas afirmou que “apostamos por instalar columpios accesibles nas zonas de xogo infantil e eliminaremos todas as barreiras que aínda quedan como esta do Paseo Fluvial”

Lugo, 21 de marzo 2015. O candidato do BNG-Asambleas Abertas, Rubén Arroxo, visitou a zona do Paseo Fluvial, acompañado do piloto de rallyes Avelino Basanta, para comprobar as limitacións que teñen as persoas que se teñen que mover en cadeira de rodas para acceder a esta zona de lecer a carón do Miño. Arroxo dixo que “para que Lugo funcione as áreas de lecer teñen que ser totalmente accesibles” e engadiu que “non so teñen que estar adaptadas as zonas de ocio, os accesos teñen que ser permeables para permitir o paso de cadeiras de rodas e bicicletas, mentres se impide o acceso aos vehículos de motor”.

O candidato do BNG-Asambleas Abertas afirmou que “apostamos por instalar columpios accesibles nas zonas de xogo infantil e eliminaremos todas as barreiras que aínda quedan como esta do Paseo Fluvial”. Rubén Arroxo explicou que “Lugo non conta con ningunha zona infantil con elementos de xogo accesibles para nenas e nenos que teñen a súa mobilidade limitada”. Arroxo indicou que “no caso do Paseo Fluvial é evidente que a cadea pode ser facilmente substituíble por un sistema de bolardos”.

Arroxo afirmou que “non pode haber elementos como a cadea que pecha o Paseo Fluvial a carón da Fábrica da Luz” e sinalou que o aparcadoiro para persoas con discapacidade, e tamén o final do carril-bici, están xusto a carón da entrada pechada cunha cadea. Arroxo sinalou, referíndose ao Paseo Fluvial que “vemos como un extremo está totalmente aberto e se permite, incluso, o estacionamento de vehículos ao longo do Paseo en determinados eventos, mentres o outro extremo está pechado cunha cadea que impide o paso de bicicletas e cadeiras de rodas”.