Outeiro afirma que “o Consello de Europa criticou recentemente a política do “plurilingüismo” de Feijóo por reducir o galego en todas as instancias educativas”

Un convenio coa Confederación Hidrográfica do Miño-Sil permitirá arranxar as marxes do Cabe ao seu paso por Monforte

Lugo, 2 de novembro de 2012. O portavoz do BNG na Deputación de Lugo e delegado das áreas de Cultura e Turismo, Mario Outeiro, amosou, na rolda de prensa celebrada trala Xunta de Goberno de hoxe, a súa discordancia “coa política lingüística da Xunta de Galiza, que se basea en cubrir o expediente porque existe un departamento que é a Secretaría Xeral de Política Lingüística, pero logo todos os estudos e análises confirman a perda alarmante de coñecemento e uso do idioma galego en todas as instancias educativas e idades, como ilustra a cifra de que só o 3% de escolas de educación infantil imparten esta ensinanza en galego. Desta tendencia de desprotección do galego por parte da Xunta alertou recentemente o Consello de Europa, xa que o organismo internacional criticou especialmente a “redución gradual” do ensino en galego “en todos os niveis” e lembra que a obriga dos poderes públicos é garantir liñas educativas nucleadas no idioma propio de Galiza”.

Mario Outeiro lembrou que na Carta Europea de Linguas elaborada polo comité de expertos do Consello de Europa “apuntan que o modelo do chamado “decreto de plurilingüismo” imposto por Feijóo contra o criterio da comunidade educativa non debe afectar á media de presenza do galego na escola, como si está a facer. Lembremos que nestes momentos, nas estimacións máis optimistas, só o 20% do ensino non universitario se desenvolve en galego e que só o 3% dos centros de infantil das cidades declaran impartir as aulas na lingua do país. Ningunha outra lingua oficial no Estado español se encontra cunha situación tan limitada”.

 Fronte a isto, o delegado de Cultura e Turismo da Deputación afirmou que “desde esta administración, pola contra, traballamos sempre coa mirada posta en que cada actividade que desenvolvemos ou promovemos sexa desenvolvida en galego e afonde nun maior uso, respecto e promoción da nosa lingua. De feito, ademais do propio servizo de Normalización Lingüística da Deputación, que traballa de xeito interno promovendo a normalización do galego na xestión da documentación e trámites, e tamén presta servizo aos concellos e á cidadanía, colaboramos cos centros de ensino programándolles actividades culturais que poñen en valor o noso idioma, como pode ser coas organizadas ao redor da semana do libro, a creación e exhibición xunto con actividades arredor dos debuxos animados infantís en galego “Caracois”, dinamización do galego e o portugués co programa OPS! e o apoio ao Correlingua, ou a proxección dun filme en galego como Vilamor”.

 Mario Outeiro tamén lembrou “o apoio que desde a Deputación de Lugo se lle presta a todas as institucións que traballan a prol do galego desde os seus diferentes ámbitos, como a Real Academia Galega, a Asociación de Escritores en Lingua Galega, etc., así como tamén se apoian iniciativas puntuais como moreas de certames literarios e proxectos tan necesarios e importantes como o Vocabulario Forestal (español-galego-inglés). Isto só son unha serie de exemplos do que unha administración responsábel pode facer a prol da nosa cultura e do noso idioma, por iso, recollendo o ditame do Consello de Europa, queremos desde aquí instar ao goberno da Xunta de Galiza a que tome cartas no asunto e non deixe que a nosa lingua siga perdendo falantes”.

 Vicepresidencia destaca que a eficiente xestión da Deputación permite asumir novas actuacións e seguir facendo políticas sociais

 Mario Outeiro insistiu na confirmación de que “a Vicepresidencia da Deputación aportará durante os vindeiros tres anos un total de 940.000 euros, inversión derivada do convenio de colaboración asinado co concello de Monforte e a Confederación Hidrográfica do Miño - Sil para o mantemento e conservación das obras de acondicionamento do canle e as marxes do río Cabe ao seu paso polo municipio lucense de Monforte de Lemos no tramo comprendido entre A Compañía e a parroquia de Espiñeira”.

“Materialízase así o compromiso adquirido polo ente provincial en 2011 para ampliar o paseo fluvial do Cabe, un proxecto ambicioso para Monforte que cambiará a súa fisionomía”, segundo explicou o portavoz e delegado provincial de Cultura e Turismo, Mario Outeiro, quen desmentiu que nalgún momento estivera en perigo a aportación da Deputación.

Outeiro insistiu en que "trátase dunha actuación ambiciosa que pode acometerse grazas á eficiencia na xestión económica a nos permite manter cousas como o Servizo de Axuda no Fogar básico que a Xunta nega ao concellos con menos de 20.000 habitantes e seguir apoiando iniciativas sociais a prol da integración dos colectivos máis necesitados”.