Comarca de Lugo Centro

Aínda non sabemos nada da rotonda na confluencia de San Eufrasio con Fontiñas

Lugo, 08 de agosto 2017. O BNG preguntará polas xestión do goberno municipal en relación á toma de medidas para mellorar o tráfico na zona de Fontiñas. O portavoz do BNG, Rubén Arroxo lembrou que nos pasados meses de decembro e xaneiro a organización nacionalista tivo unha serie de xuntanzas coa veciñanza de Fontiñas co fin de preparar algunhas propostas para a mellora da mobilidade na avenida, propostas que o propio grupo municipal lle trasladou ao goberno municipal “tras recibir as propostas do BNG, o goberno municipal anunciou o pasado mes de febreiro que se ían iniciar os trámites para ver a posibilidade de aplicar medidas como a creación dun novo carril e deseñar novos aparcadoiros” e engadiu “dende aquel anuncio nada se volveu saber do tema”. “Neste momento non se tomou ningunha medida efectiva como a tan demandada de crear unha rotonda na confluencia con San Eufrasio” un punto este último que conta cun importante número de colisións e que o concelleiro do BNG responsabiliza á Xunta e Concello de non ser quen de poñerse de acordo para executala.

Rubén Arroxo lembrou “o 17 de febreiro o goberno pediulle ao gabinete de tráfico un informe sobre a posibilidade de crear un novo carril e deseñar novos aparcadoiros”. O BNG propuxo unha serie de medidas para mellorar a circulación na zona de Fontiñas. Rubén Arroxo dixo que “temos un plan para a zona e aínda que as medidas que presentamos agora non son a solución definitiva si que van a contribuír a mellorar a fluidez do tráfico”. Entre as propostas do BNG están a de dispoñer de dous carrís, cando menos dende Montero Ríos ata o cruce co carril dos Indios, considerando que o ideal sería chegar ata o carril do Xuízo, e recuperando esas prazas de aparcadoiro nalgúns dos solares abandonados da contorna que son públicos e outros chegando a acordos cos propietarios. Arroxo explicou que a creación de dous carrís en cada sentido de circulación nestes tramos suporía a eliminación dunhas 40 prazas de estacionamento, pero aplicando esta medida xunto coa creación de tres aparcadoiros disuasorios na zona, crearíanse unhas 200 novas prazas.

Cambiar o sistema de xiro nos cambios de sentido para dar axilidade á circulación é unha das propostas do BNG. Este sistema de xiro, coñecido como “xiro á Indonesia”, xa se aplica en moitas avenidas de diversas cidades e permite que os vehículos afronten o cambio de sentido da marcha sen agardar polos vehículos que fan o cambio de sentido contrario. Arroxo sinalou que este novo sistema de cambio de sentido da circulación podería aplicarse naqueles puntos nos que non existe intersección de viais e sería factible facelo en catro lugares, sendo especialmente útil para darlle fluidez xunto a Praza do Camiño Primitivo e en fronte da escalinata de Paxariños.

Lugo, 7 de agosto de 2017. O BNG vén de rexistrar unha solicitude de comparecencia en pleno para o concelleiro de desenvolvemento sostible para que dea explicación da constante perda de axudas doutras institucións que está a ter o Concello de Lugo por unha mala xestión política. O portavoz nacionalista, Rubén Arroxo, explicaba que a intención do grupo sería que declarase a alcaldesa, por ser cuestións que afectan de forma transversal a case todas as áreas, pero a actual normativa só permite solicitar a de algún concelleiro ou concelleira “entendemos que o lóxico sería que comparecese a alcaldesa, mais o regulamento de pleno só contempla a posibilidade de que sexa un concelleiro”. Para o BNG a pinga que colmou o vaso foi a publicación neste pasado venres na páxina web da Xunta de Galiza, na que se pode observar que Lugo é a única cidade galega que non solicitou as axudas para a rehabilitación nas zonas declaradas como ARI. Lugo a día de hoxe conta con 2 zonas nesa situación (o casco histórico e o barrio do Sagrado Corazón), a día de hoxe quedan moitas vivendas por rehabilitar no espazo ARI de Lugo polo que é realmente un paso atrás que non se dispoña desta posibilidade.

Rubén Arroxo lamenta esta mala xestión “o goberno insiste de forma reiterada en que non hai partidas económicas para executar diferentes proxectos, pero cando estas partidas chegan non se solicitan”. O propio concelleiro nacionalista dixo que o goberno municipal “nin ten ningún plan para a rehabilitación dos barrios de Lugo, nin ten ningún interese”, lembrando que no pasado mes de maio o seu grupo levou unha vez máis a unha comisión o tema de declarar o barrio da Milagrosa como ARRU para poder optar a partidas para a rehabilitación dos edificios e recuperar os espazos urbanos, algo que para o BNG é prioritario para poder recuperar o que é o barrio máis poboado da cidade e que na actualidade ten un importante número de edificios en situación de ruína ou pechados “para un barrio como a Milagrosa a única solución de recuperarse é o ARRU, polo que queremos saber cales son as razóns para que o goberno municipal non faga nada para acadalo” dixo Rubén Arroxo, lembrando que naquel momento o propio goberno municipal recoñecía que non se fixeran os trámites adecuados para solicitar dito ARRU.

Dende o BNG lembran que a perda destes fondos se suman á situación que o propio grupo municipal denuncio a pasada semana, coa que o concello tampouco pediu as axudas da biomasa do INEGA para o 2017 e que están en serio risco as de 2016 pola lentitude en executalas, tendo en conta que o 15 de outubro rematan os prazos para xustificalas “Lugo non pode seguir perdendo fondos, precisamos unha mudanza seria na xestión do noso concello”.

Lugo, 4 de agosto de 2017. O voceiro do BNG no concello de Lugo, Rubén Arroxo, denunciou unha vez máis a ausencia dunha estrutura de madeira situada na parte baixa do paseo do río Rato á altura da Tolda, que foi levada por unha riada en xaneiro de 2016 “vai ano e medio dende que o río a arrincou, é unha obra dun custo baixísimo e que fai servizo a moita xente que estes días pasa por estes parques, e malia que dende o BNG levemos todo este tempo pedindo o arranxo nada se fixo” explicou Rubén Arroxo, lembrando que non só foi pedido polo grupo municipal, senón que ata os deputados provinciais do BNG chegaron a levar esta cuestión a un pleno da Deputación de Lugo sen que aínda se resolvese. O portavoz nacionalista lamenta o pouco interese que teñen as diferentes administracións nas zonas verdes do municipio “temos o luxo de vivir nunha cidade rodeada de espazos que son unha autentica marabilla, mais a pesar disto as administracións fan moi pouco por mantelas atendidas” explicaba o concelleiro do BNG.

O portavoz do BNG tamén pediu que se limpase os dous sendeiros que unen os Parques do Miño co do Rato. A día de hoxe o sendeiro que está situado paralelo á N-VI está practicamente pechado pola maleza, causando molestias as centos de persoas que diariamente se moven pola zona nestes meses de verán, o propio concelleiro explicou que “Non é aceptable que se deixe pechar o camiño pola maleza e máis na época na que máis xente pasa pola zona, nestes momentos non é posible cruzarse dúas persoas, nun sendeiro que cando está limpo ten un ancho cómodo e seguro”. Cómpre ter en conta que é un tramo curto de en torno a 300m, “e que non supón ningún esforzo económico para a administración”.

O BNG tamén quixo lembrar a existencia dun acordo plenario de decembro do 2015 “o pleno municipal aprobou por unanimidade unha proposición do BNG para instar ás diferentes administracións que se faga un mantemento constante e un arranxo das deficiencias destes sendeiros, que son un espazo de ocio da veciñanza de Lugo, o certo é que precisamente dende que se deu este acordo, é cando menos atención se lle está a dar” explicou o portavoz nacionalista, lembrando que “de pouco serven estes espazos verdes se non se lles acometen os mantementos precisos”.    

Rubén Arroxo sinalou “non entendemos o pouco interese do goberno municipal en mellorar a xestión enerxética por sistemas máis ecolóxicos e máis económicos”

Lugo, 2 de agosto 2017. Se o BNG denunciaba publicamente o pasado luns que o concello de Lugo podía quedar por causas dunha nefasta xestión política sen unha subvención de 776.255,47 € adxudicada polo INEGA para un proxecto de rede de biomasa, no día de hoxe podemos ver na web do INEGA que o concello de Lugo non solicitou a que saíu no 2017. O portavoz do BNG no concello de Lugo, Rubén Arroxo, mostrouse bastante sorprendido ao ver o listado de beneficiarios desta axuda na que non aparece o concello lucense “non entendemos o pouco interese do goberno municipal en mellorar a xestión enerxética por sistemas máis ecolóxicos e máis económicos”. No listado que aparece na web do INEGA, publicado este 1 de agosto, pódese observar que se concederon 121 axudas a entidades locais galegas, e a ausencia de Lugo nese listado é para o BNG “unha nova oportunidade perdida de facer proxectos na cidade”

A convocatoria de axudas baixo o título de “subvencións para o ano 2017 a proxectos de biomasa para administracións locais e autonómica, entidades sen ánimo de lucro, empresas e autónomos” foi publicada no DOG do 22 de marzo do 2017 e existía un prazo ata o 24 de abril para solicitala, algo que para o BNG “é tempo máis que suficiente se se ten un proxecto do que se quere para Lugo”. Estas axudas cubrían ata un 80% da inversión, unha cantidade que o BNG considerou moi importante.

O concelleiro do BNG, Rubén Arroxo, pediu “un cambio de rumbo na xestión municipal” entendendo que a día de hoxe o goberno municipal segue sen un proxecto claro para Lugo malia levar xa máis de 2 anos de mandato. O BNG cre que proxectos coma o da biomasa, que son alternativas directas ao petróleo e que aforran cartos, deben ter maior consideración por parte do executivo local.

Axudas do 2016. Con respecto ás axudas outorgadas a Lugo o 22 de decembro do 2016, o BNG volve insistir en que dificilmente se podan ampliar os prazos, tal e como se xustificou o goberno municipal, lembrando que non hai ningún documento oficial no que apareza dita cuestión, polo que estas terían que estar xustificadas antes do 15 de outubro, algo que Rubén Arroxo volveu considerar de “moi complicado”, polo que pediu atención máxima deste asunto para evitar perder os preto de 800.000€.

Bases axudas: http://www.inega.gal/subvencions/subvencions/Energiasrenovables/2017/ficha_renovables2017_0003.html

Concedidas: http://www.inega.gal/sites/default/descargas/subvencions/SubvencionsPDF/Relacion_axudas_BiomasaFEDER2017.pdf

Lugo, 1 de agosto 2017. O BNG lamentou que o escurantismo que mantivo o goberno municipal no deseño das novas liñas de autobuses urbanos, na cal non se permitiu participar á oposición, dea como resultado unha peor conexión no rural. O grupo nacionalista, que solicitou en reiteradas ocasións que se convocase unha comisión co fin de poder tratar entre todos os grupos as diferentes propostas, considera que as liñas agora propostas non son nin moito menos as mellores, sobre todo no que afecta á zona rural “non só non se amplían as liñas que conectan a zona urbana coas parroquias, senón que nalgúns casos como Muxa ou Castelo redúcense” afirmou Rubén Arroxo. O propio portavoz municipal explicou o exemplo da liña que antes pasaba por Castelo e subía ata a Ronda da Muralla, agora desviarase por Fontiñas, algo que cuestionou, posto que moita poboación da zona agora terá que cambiar de bus na propia Ronda das Fontiñas para subir ata o centro, dificultando a mobilidade especialmente para a poboación maior. Neste mesmo sentido o concelleiro tamén lamentou que non se intentase ampliar as liñas de buses no rural, posto que nas súas palabras “do outro lado do Miño, no que son as parroquias da zona oeste do concello, o servizo de transporte público é na práctica inexistente”.

O grupo nacionalista propón reunir a todos os grupos municipais e mirar que posibilidades de modificación das liñas existen, “entendemos que hai que xuntarse e falar de solucións, porque se queremos que viva xente no rural o que non se pode é seguilo deixando en estado de esquecemento e de recorte de servizos” explicaba Rubén Arroxo lembrando que estas xuntanzas se deberon ter feito antes de presentarse as novas liñas “posiblemente a alcaldesa quixo sacar en solitario o titular das novas liñas, sen ter nin tan se queira analizado se melloraban a situación anterior” afirmou o portavoz do BNG.

Recollida de sinaturas. A propia veciñanza do rural está a cuestionar estas novas rutas, nalgunhas parroquias como Castela ou Muxa comezaron a facer unha recollida de sinaturas para non perder o servizo de transporte público.

Lugo, 31 de xullo 2017. O BNG denuncia publicamente que por causas dunha nefasta xestión política o concello pode perder 776.255,47 € dunha subvención adxudicada polo INEGA, baixo o procedemento de “proxectos de redes de distribución de enerxía térmica con equipos de xeración con biomasa”, que foi publicada no DOG o pasado 22 de decembro do 2016. O Concello de Lugo, que solicitou esta subvención para levar a cabo nas instalacións deportivas do Parque da Milagrosa, e que permitirían un aforro importante a nivel económico na xeración de calor para quentar a auga das piscinas e das instalacións colindantes, pode estar a un paso de perdela. Rubén Arroxo informou que na situación actual é case imposible que se poida levar a cabo, dado que o 30 de setembro tería que estar xustificada a compra das caldeiras e o 15 de outubro a instalación da rede, e a día de hoxe nin tan se queira se sacaron a licitación, tendo en conta os prazos que un procedemento de licitación aberta coma este leva consigo. O concelleiro nacionalista afirmou que “se finalmente non se consegue executar, sería dunha xestión política nefasta, posto que o Concello de Lugo non só perdería unha subvención desta cuantía, senón que ademais seguiría a ter uns gastos nas instalacións deportivas que se poderían minimizar”.

O BNG considera que se o goberno municipal non é quen de solucionar isto, atopariámonos nunha das actuacións máis desastrosas do executivo local. Rubén Arroxo chamou ao concello local a “poñerse as pilas no asunto de forma urxente” para evitar que Lugo perda eses case 800.000 €  “isto é sinónimo de que o concello funciona a salto de mata, non só non hai proxecto de concello, senón que ata se desfai o que che dan na práctica feito”

Expediente de crédito. Unha das causas do retraso é a aprobación de crédito para poder levar adiante este proxecto. No pleno de xuño aprobáronse 258.752€ para a parte que lle corresponde ao concello, mais o goberno municipal xa debería ser consciente de que habería un período de alegacións, as cales foron presentadas, polo que poden retrasar a aprobación definitiva ao pleno ordinario do 28 de setembro, a non ser que se convoque un pleno extraordinario, situación esta que imposibilitaría de facto toda posibilidade de execución. O portavoz do BNG entende que ante unha situación coma esta, e tendo en conta que o goberno municipal era coñecedor dende o 22 de decembro da aprobación de dita subvención, podería ter levado un expediente de crédito ao pleno nos primeiros meses de ano para sacar este proxecto adiante con garantías. O portavoz do BNG afirmou “é unha neglixencia política que non se intenten iniciar as negociacións dos orzamentos ata maio, e non resolvan isto con tempo necesario”

Lugo, 28 de xullo 2017. O BNG-AA instalou un “letreiro de obra” nas Saamasas no lugar onde ten os permisos pertinentes da Confederación Hidrográfica Miño Sil e da Consellería de Medio Ambiente, no que apunta información sobre o acceso ao río anunciando que o prazo de execución de obra será en canto a Deputación de Lugo o permita “nós deixámolo claro, en canto a Deputación o permita, que é a propietaria do terreo, faremos o acceso” sinalou Rubén Arroxo. O concelleiro nacionalista critica que o PSOE estea tan empeñado en evitar que a veciñanza de Lugo teña unha zona pública no río onde bañarse, e que despois de 8 anos sen facer nada, e cunha proposta do BNG aprobada en pleno, agora siga boicoteando unha proposta do propio grupo nacionalista “temos os permisos das outras institucións, pero o PSOE utiliza a Deputación como ferramenta para evitar que poidamos instalar o acceso”.

O BNG lamentou que xa pasara un mes dende que recibiu todas as aceptacións medioambientais, e que o goberno provincial do PSOE siga impedindo o uso deses terreos “o presidente da Deputación nin tan se queira aceptou recibirnos para falar do tema, tal e como lle pedimos hai 3 semanas, é unha pataleta que ten o PSOE de poñerse totalmente en contra de que a xente de Lugo poida usar o río para o baño” afirmou o voceiro do BNG, lembrando que Lugo segue a ser un dos poucos concellos polos que pasa o Miño e que non dispón dunha zona pública para o baño.

Para o BNG a posición que ten o PSOE a respecto da zona pública de baño no Miño é a de “non facer, nin deixar facer”, engadindo ademais que se destaparon todas aquelas falacias soltadas polo propio goberno de que era imposible facer esta infraestrutura en Lugo, ao descubrir o BNG, e facelo público, que o goberno municipal nunca rematara as xestións administrativas necesarias “o PSOE vai lograr algo inaudito, impedir que unha iniciativa positiva para Lugo como é esta, e con todos os permisos aceptados, quede paralizada polos seus caprichos” explicou Rubén Arroxo.

Lugo, 26 de xullo 2017. O BNG propón instalar un parque infantil no espazo situado na Carballeira de Nadela, dende a formación nacionalista informan que as nenas e nenos que alí viven, ou van ao colexio, non teñen ningunha instalación de xogos antes de chegar a Lugo “en Nadela e na súa contorna agrúpase un importante número de nenas e nenos, polo que sería idóneo darlles un espazo de lecer” dixo Rubén Arroxo. A proposta do BNG sería a de unir neste lugar, cunhas condicións xa de por si positivas pola sombra das propias árbores, un parque infantil con algúns aparatos de exercicios para persoas adultas dentro dun parque biosaudable, “a idea é que permita un uso interxeracional do espazo, de tal forma que se acade un lugar de encontro social entre nenas e nenos con persoas adultas” dixo o concelleiro nacionalista.

O BNG entende que o rural precisa de servizos básicos e tamén de espazos de dinamización e de encontro, de aí que considere a necesidade de deseñar parques e zonas de lecer co fin de que a poboación das parroquias teña os mesmos servizos e alternativas que a xente da cidade “querer que a xente viva no rural non pode ser só un eslogan, precisamos dar servizos como o abastecemento de augas, transporte ou internet pero tamén parques e prazas nas que as persoas se poidan xuntar e poidan sentarse a falar, a facer exercicio, e que os nenos poidan xogar” dixo Arroxo. Nesta liña o BNG vén de rexistrar un iniciativa para a comisión de Medio Rural de cara a que o goberno municipal deseñe unha liña de execución destas infraestruturas de forma repartida entre diferentes parroquias do municipio.

Lugo, 21 de xullo 2017. O BNG colocou unha mesa informativa en Santo Domingo para chamar ás veciñas e veciños de Lugo a participar un ano máis na mobilización do Día da Patria Galega, que terá lugar o vindeiro martes 25 ás 12 horas dende a Alameda de Santiago de Compostela. Dende a organización nacionalista cren que a mobilización será masiva, dado que é o momento de esixir que Galiza conte “Reivindicar os nosos dereitos como pobo de forma masiva é a única vía para evitar que Galiza siga quedando atrás” dixo Rubén Arroxo. Para o BNG o exemplo do abandono do estado sobre Galiza é Lugo, cun ferrocarril do século XIX, cunhas autovías que nunca rematan, cun sector gandeiro cada día peor pagado e unha industrialización que nunca chega. Mais tamén hai moitos máis exemplos que dende a propia organización consideran que urxe esixir, como é a necesaria tarifa eléctrica galega, que permitiría reducir o custo nun 30% na factura da luz, coas conseguintes melloras na economía domestica, e cos beneficios para a instalación de industria e por tanto para a creación de postos de traballo que reducirían a emigración forzosa que está a vivir o país.  “Animamos ás veciñas e veciños de Lugo a vir o 25 a Compostela para amosar xunto a outras miles de persoas chegadas de todo o país, que temos capacidade de pelexar polo que nos corresponde” dixo Rubén Arroxo.  

Tamén nesta mesa informativa o BNG seguiu coa campaña que leva a respecto de solicitar un xulgado de violencia de xénero, a edil Maite Ferreiro sinalou que xa son moitas as persoas que asinaron esta reivindicación e que contan con poder facer entrega neste outono das sinaturas, antes do 25 de novembro, día internacional contra a violencia de xénero, co fin de que a Xunta de Galiza escoite a necesidade que teñen deste xulgado as mulleres de Lugo que foron ou poidan ser vítimas.

Lugo, 20 de xullo 2017. O BNG solicítalle a Fomento o arranxo do firme das vías de servizo da Ronda Norte, de xeito especial no entorno do polígono das Gándaras. O seu portavoz, Rubén Arroxo explicou que o pavimento da estrada que sae directamente dende dito polígono cara Albeiros está nunha situación de abandono absoluto polo que causa molestias ás persoas que por alí circulan. O propio edil dixo que esa ruta incrementou de forma considerable o tráfico de vehículos nos últimos anos, dado que une directamente a rúa Montefaro co polígono, sendo o percorrido máis curto para chegar á parte central da avenida da Coruña “estas vías son usadas por un importante número de vehículos diarios, porén o estado é deplorable”.

Dende o BNG afirmaron que xa hai anos que algúns veciños presentaron queixas por esta cuestión, malia todo a situación non mudou o máis mínimo “recibimos en varias ocasións queixas de veciños de Lugo que pasan por aí diariamente e xa non saben que facer para que arranxen o firme, polo que non conciben que unha obra relativamente pequena, como é esta, leve tanto tempo atascada no tempo”.  O propio concelleiro explicaba que resulta incoherente intentar promover que haxa empresas nos polígonos e que despois as propias institucións non sexan quen de darlle un mantemento acaído aos seus accesos.

A Festa da Patría enmarcase nunha serie de actos previos á celebración do 25 de xullo que se están a desenvolver en todas as comarcas do país