bng

Lugo, 11 de agosto de 2017. A parlamentaria do BNG por Lugo, Olalla Rodil insiste en que os xulgados do social de Lugo seguen a estar desbordados, polo que as medidas tomadas non lograron dar solución. dun novo xulgado do Social. “O nomeamento dunha xuíza de apoio non serviu para rematar co colapso que padecen os tres xulgados do social de Lugo como denuncia o persoal xudicial e o Colexio da Avogacía de Galiza” afirmaba a deputada, “o que precisa Lugo é crear canto antes un novo xulgado dotado dos recursos humanos, materiais e económicos necesarios”. Rodil explicou que o partido xudicial de Lugo conta na actualidade con tres Xulgados do Social e sinalou que “en diferentes ocasións o persoal que traballa nos mesmos solicitou ao TSXGa adopción de medidas de reforzo, quer específicas, quer para cada un dos órganos e mesmo chegaron a remitir unha proposta de plan de reforzo o 9 de setembro de 2014”.

Olalla Rodil lembrou que “xa en abril do pasado ano houbo mobilizacións de protesta convocadas polas organizacións sindicais perante os Xulgados” e lembrou que “no ano 2015, os tres Xulgados do Social de Lugo celebraron unha Xunta Sectorial na que solicitaron a creación dun novo xulgado e no caso de non se incrementar a planta xudicial”.

Desde a formación nacionalista lembran que o Parlamento de Galiza aprobou por unanimidade en xaneiro de 2017 unha inciativa na que insta á creación do 4º xulgado do social diante das cada vez máis amplas demoras no sinalamento das causas “datadas nalgúns casos xa para 2020”. Tamén o pleno municipal de Lugo aprobaba por unanimidade en decembro do 2016 a iniciativa do BNG para esta cuestión

“É unha vulneración do dereito á tutela xudicial efectiva que todas e todos temos recoñecido pois hai traballadores agardando que se resolvan despedimentos improcedentes ou salarios adebedados dous ou tres anos”, sinalou a deputada do BNG, Olalla Rodil. “Situacións coma esta deixan nunha situación de desprotección a moitas persoas simplemente por non contar con persoal suficiente”.

“Defendímolo en xaneiro e volveremos facelo agora, esta situación é insostíbel”, afirman desde o BNG. Desde o BNG lembran que na última xuntanza entre o Consello Xeral do Poder Xudicial e a Xunta de Galiza acordaron crear 4 novas unidades xudiciais que estarán en funcionamento en 2018 mais nese acordo “Lugo volve quedar na cola malia que as cifras refliten a necesidade de contarmos con máis un xulgado”

Lugo, 11 de agosto 2017. A edil do BNG en Lugo, Maite Ferreiro, volveu lembrar a necesidade de dotar ao concello dunha ordenanza de publicidade, para que entre outras cousas, o concello teña unha ferramenta para poder impedir a instalación de carteis que denigran a imaxe da muller. A concelleira do BNG lembrou que tanto o pleno do concello coma o foro de igualdade xa se pronunciaron sobre este tema grazas a iniciativas que o BNG (o BNG levou a pleno unha proposición no 2013 que foi aprobada) trasladou, e o que hai que facer está claro, o goberno municipal ten que poñerse a traballar para elaborar a ordenanza municipal de publicidade sen máis retrasos.

No ano 2013 o pleno do concello xa aprobou, a iniciativa do BNG, unha moción na que se propoñía a creación dunha Ordenanza reguladora da publicidade na que se establezan os mecanismos necesarios para que non se poida denigrar a imaxe da muller, nin empregala como reclamo publicitario en vía pública nin en espazos privados que se observen desde a mesma. Esta cuestión tamén foi trasladada e aprobada no foro de igualdade no mes de agosto de 2013.

A edil do BNG lembrou que en xaneiro deste ano se publicou no BOP o anuncio da consulta pública previo á ordenanza de publicidade exterior “malia que xa se avanzaron pasos hai 7 meses, hoxe continua sen finalizarse, polo que lle pedimos á concelleira responsable da área de igualdade, unha maior seriedade ao respecto”. O BNG lembrou que a súa formación instalou no mes de maio deste mesmo ano un panel publicitario nunha valla no que cuestionaba precisamente o uso da explotación das mulleres para fins publicitarios.

Lugo, 10 de agosto de 2017. O edil do BNG-AA en Lugo, Rubén Arroxo, lembrou que os grupos políticos da corporación municipal seguen fóra das mesas de contratación e das xuntas de compras. Arroxo explicou que no pleno do mes de setembro do ano pasado a partir dunha iniciativa do BNG a corporación acordaba, co voto en contra do goberno, a presenza dos grupos nas mesas de contratación e nas xuntas de compras, tal e como viña sendo ata o inicio deste mandato, engadindo ademais o propio concelleiro que “ao igual que sucede con outras moitas iniciativas aprobadas no Pleno, este acordo segue sen executarse” algo que para o BNG é unha falta de respecto á democracia municipal.

En setembro o BNG levou unha proposición ao pleno do concello para pedir que os grupos políticos volvan ter presenza nas mesas de contratación e nas xuntas de compras. Para Rubén Arroxo a presenza dos grupos nas mesas de contratación e nas xuntas de compras “é garante de transparencia dos órganos nos que se gastan os cartos públicos”, debido a que nestes organismos é onde se executan as compras de todo tipo de material para a institución e para o uso publico da veciñana, ou onde se contratan as empresas que van xestionar os diferentes servizos municipais. Neste sentido, e a resposta da habitual argumentación por parte do propio goberno, Arroxo aclarou que “evidentemente que podemos asistir como cidadáns a estas xuntanzas, tamén poderiamos facelo aos plenos, pero a alcaldesa esquece que foron as e os lucenses quen nos elixiron para que os representemos, como forzas políticas, nesta institución, xa que non é o mesmo presentarse neste organismo, que recibir unha convocatoria con toda a documentación que se vai xestionar”.

O edil do BNG sinalou “todo o mandato se está falando de transparencia neste concello e cando, de verdade, se fai unha proposta sería para este ámbito, non se cumpre”. Durante o principio do mandato aprobáronse varias iniciativas, de diferentes grupos políticos, nas que se propoñía mellorar e establecer mecanismos para incrementar a transparencia da xestión pública municipal. As mesas de contratación e as xuntas de compras son dous dos órganos nos que se efectiviza gasto de diñeiro público e “por iso, ao mellor, á alcaldesa lle preocupa a nosa proposta” afirmou Arroxo.

“O sorprendente é o interese do PSOE en non querer aos representantes electos nas Mesas de Contratación” dixo Rubén Arroxo. “Que os grupos políticos teñamos presenza nas mesas de contratación e nas xuntas de goberno non quere dicir que tomemos decisións, que para iso está o goberno, pero teremos toda a información de como, ese mesmo goberno, adxudica os cartos públicos” explicou aoedil do BNG.

O BNG sempre defendeu a presenza de todos os grupos políticos da corporación na Xunta de Compras e a Mesa de Contratación co fin de afondar precisamente na transparencia municipal, e que as forzas políticas que representan, dentro do concello ao pobo de Lugo, poidan ser observadores directos das inversións que a institución fai co diñeiro público. “Cando daba inicio o actual mandato, unhas das primeiras medidas tomadas foi precisamente a da suspensión destes dous órganos municipais, dando un paso atrás de moitos anos na transparencia do Concello de Lugo” afirmou Rubén Arroxo.

Lugo, 10 de agosto de 2017. O grupo parlamentar do BNG, a través da súa viceportavoz e deputada pola provincia de Lugo, Olalla Rodil, presenta unha proposición non de lei co fin de instar á Xunta de Galiza a realizar un plan orzamentado que interveña a igrexa de San Salvador de Soutomerille e toda a súa contorna, onde se atopa diferentes elementos algúns deles catalogados como Ben de Interese Cultural (BIC) como son a Torre de Arriba e a Torre de Abaixo, e que seguen no esquecemento institucional “O estado de abandono dun lugar como Soutomerille, en pleno Camiño Primitivo e no que se atopan dous Bens de Interese Cultural (A Torre de Arriba e a Torre de Abaixo, cuxa catalogación como BIC data de 1994) é inadmisíbel”, afirmou Olalla Rodil. Por iso, engade, “reclamaremos á Xunta que desenvolva un plan de actuación con orzamento suficiente para recuperar e pór en valor este espazo no que se atopan tamén unha igrexa prerrománica, a de San Salvador, e castiñeiros tricentenarios” ao redor do

adro e nas proximidades do castro, a Croa de Soutomerille. Soutomerille é un lugar privilexiado, por onde pasa o Camiño Primitivo, cunha paisaxe cuberta por carballos e castiñeiros con centos de anos, e con un patrimonio importantísimo e único, como é o estilo visigótico da propia igrexa ou o que se considera o cemiterio máis pequeno de Galiza.

O BNG lembra que o Goberno bipartito prevía desenvolver un plan de recuperación e posta en valor deste lugar, mais coa chegada do Partido Popular á Xunta de Galiza en 2009 “todo quedou paralizado e aínda que os valos continúan alí, anos despois, para sorpresa de quen visita Soutomerille”. As demandas que traslada o BNG ao Parlamento recollen as denuncias públicas desenvolvidas en múltiples ocasións desde a asociación Amigos do Patrimonio de Castroverde que leva anos reclamando actuacións por parte do Goberno galego para recuperar os inmóbeis e a igrexa de Soutomerille.

Desde o BNG lembran que o Camiño Primitivo foi declarado Patrimonio da Humanidade e a propia Xunta promove a través de Turgalicia a visita a Soutomerille na etapa que transcorre polo Concello de Castroverde, “non se entende entón o abandono no que se atopa este lugar senón é polo desleixo do goberno”. Soutomerille acolle tamén un cemiterio considerado o máis pequeno de Galiza con apenas 9 nichos ocupados.

Lugo, 09 de agosto de 2017.  A concelleira do BNG, Maite Ferreiro presentou unha serie de preguntas para a comisión municipal de Cultura de cara a saber en que situación se atopa o estudo para a posible escavación do Castro da Piringalla. O pleno municipal, por iniciativa do BNG, aprobaba por unanimidade en setembro do 2016 un acordo para iniciar os estudos pertinentes para coñecer os restos que existen baixo terra da Agra dos Castros na zona norte da cidade, que se descubriron no ano 2007, no transcurso dunhas obras municipais de substitución dunha das tubaxes de canalización de auga que conducen aos depósitos municipais situados xusto enfronte do castro. A concelleira nacionalista considerou moi importante poder poñer en valor estes achados, que en palabras de moitos expertos permitirán resolver moitas cuestións pendentes sobre como foi o contacto que tiveron os pobos asentados en Lugo coa chegada dos romanos “entendemos que a escavación deste castro permitirá coñecer moito máis sobre a historia de Lugo, de aí que consideremos importante que se lle preste atención e que se fagan os trámites precisos para a súa recuperación” dixo Maite Ferreiro.

Para o BNG “o Castro da Piringalla, máis aló de permitirnos coñecer o pasado prerromano, pode converterse nun importante punto de atracción turística para a cidade”. Maite Ferreiro sinalou que “Viladonga demostra que estamos desaproveitado recursos que temos dentro da propia cidade”. O Castro da Piringalla ademais axudaría a dinamizar a zona norte da cidade, especialmente os barrios da Piringalla e Garabolos.

Actualmente na documentación á que teñen acceso os grupos municipais recóllese que o goberno municipal concorreu ás subvencións do programa europeo INTERREG co fin de poder optar a recursos económicos para levar os traballos pertinente. Ademais cómpre ter en conta que malia que parte dos terreos onde se sitúa o xacemento son privados, a lexislación permitiría iniciar a investigación e estudo, a maiores o PXOM recolle este espazo como zona verde dentro da unidade de actuación S-6.R, polo que se podería incluso actuar por diferentes vías urbanísticas para podelo converter nun espazo público.

O BNG propón para este espazo a escavación do castro, a posta en valor ao aire libre dos restos atopados e a construción dun pequeno museo e centro de interpretación que complete o conxunto museístico. Moi preto deste lugar tamén se atopan os restos achados do acueducto usado na época romana para traer a auga ata a cidade. Deste xeito completaríase un interesante circuito pola cidade que comezaría na época castrexa e remataría na Muralla e a romanización, podendo amosar ás persoas visitantes unha visión máis global e completa do mundo romano e da historia da cidade.

Aínda non sabemos nada da rotonda na confluencia de San Eufrasio con Fontiñas

Lugo, 08 de agosto 2017. O BNG preguntará polas xestión do goberno municipal en relación á toma de medidas para mellorar o tráfico na zona de Fontiñas. O portavoz do BNG, Rubén Arroxo lembrou que nos pasados meses de decembro e xaneiro a organización nacionalista tivo unha serie de xuntanzas coa veciñanza de Fontiñas co fin de preparar algunhas propostas para a mellora da mobilidade na avenida, propostas que o propio grupo municipal lle trasladou ao goberno municipal “tras recibir as propostas do BNG, o goberno municipal anunciou o pasado mes de febreiro que se ían iniciar os trámites para ver a posibilidade de aplicar medidas como a creación dun novo carril e deseñar novos aparcadoiros” e engadiu “dende aquel anuncio nada se volveu saber do tema”. “Neste momento non se tomou ningunha medida efectiva como a tan demandada de crear unha rotonda na confluencia con San Eufrasio” un punto este último que conta cun importante número de colisións e que o concelleiro do BNG responsabiliza á Xunta e Concello de non ser quen de poñerse de acordo para executala.

Rubén Arroxo lembrou “o 17 de febreiro o goberno pediulle ao gabinete de tráfico un informe sobre a posibilidade de crear un novo carril e deseñar novos aparcadoiros”. O BNG propuxo unha serie de medidas para mellorar a circulación na zona de Fontiñas. Rubén Arroxo dixo que “temos un plan para a zona e aínda que as medidas que presentamos agora non son a solución definitiva si que van a contribuír a mellorar a fluidez do tráfico”. Entre as propostas do BNG están a de dispoñer de dous carrís, cando menos dende Montero Ríos ata o cruce co carril dos Indios, considerando que o ideal sería chegar ata o carril do Xuízo, e recuperando esas prazas de aparcadoiro nalgúns dos solares abandonados da contorna que son públicos e outros chegando a acordos cos propietarios. Arroxo explicou que a creación de dous carrís en cada sentido de circulación nestes tramos suporía a eliminación dunhas 40 prazas de estacionamento, pero aplicando esta medida xunto coa creación de tres aparcadoiros disuasorios na zona, crearíanse unhas 200 novas prazas.

Cambiar o sistema de xiro nos cambios de sentido para dar axilidade á circulación é unha das propostas do BNG. Este sistema de xiro, coñecido como “xiro á Indonesia”, xa se aplica en moitas avenidas de diversas cidades e permite que os vehículos afronten o cambio de sentido da marcha sen agardar polos vehículos que fan o cambio de sentido contrario. Arroxo sinalou que este novo sistema de cambio de sentido da circulación podería aplicarse naqueles puntos nos que non existe intersección de viais e sería factible facelo en catro lugares, sendo especialmente útil para darlle fluidez xunto a Praza do Camiño Primitivo e en fronte da escalinata de Paxariños.

Lugo, 7 de agosto de 2017. O BNG vén de rexistrar unha solicitude de comparecencia en pleno para o concelleiro de desenvolvemento sostible para que dea explicación da constante perda de axudas doutras institucións que está a ter o Concello de Lugo por unha mala xestión política. O portavoz nacionalista, Rubén Arroxo, explicaba que a intención do grupo sería que declarase a alcaldesa, por ser cuestións que afectan de forma transversal a case todas as áreas, pero a actual normativa só permite solicitar a de algún concelleiro ou concelleira “entendemos que o lóxico sería que comparecese a alcaldesa, mais o regulamento de pleno só contempla a posibilidade de que sexa un concelleiro”. Para o BNG a pinga que colmou o vaso foi a publicación neste pasado venres na páxina web da Xunta de Galiza, na que se pode observar que Lugo é a única cidade galega que non solicitou as axudas para a rehabilitación nas zonas declaradas como ARI. Lugo a día de hoxe conta con 2 zonas nesa situación (o casco histórico e o barrio do Sagrado Corazón), a día de hoxe quedan moitas vivendas por rehabilitar no espazo ARI de Lugo polo que é realmente un paso atrás que non se dispoña desta posibilidade.

Rubén Arroxo lamenta esta mala xestión “o goberno insiste de forma reiterada en que non hai partidas económicas para executar diferentes proxectos, pero cando estas partidas chegan non se solicitan”. O propio concelleiro nacionalista dixo que o goberno municipal “nin ten ningún plan para a rehabilitación dos barrios de Lugo, nin ten ningún interese”, lembrando que no pasado mes de maio o seu grupo levou unha vez máis a unha comisión o tema de declarar o barrio da Milagrosa como ARRU para poder optar a partidas para a rehabilitación dos edificios e recuperar os espazos urbanos, algo que para o BNG é prioritario para poder recuperar o que é o barrio máis poboado da cidade e que na actualidade ten un importante número de edificios en situación de ruína ou pechados “para un barrio como a Milagrosa a única solución de recuperarse é o ARRU, polo que queremos saber cales son as razóns para que o goberno municipal non faga nada para acadalo” dixo Rubén Arroxo, lembrando que naquel momento o propio goberno municipal recoñecía que non se fixeran os trámites adecuados para solicitar dito ARRU.

Dende o BNG lembran que a perda destes fondos se suman á situación que o propio grupo municipal denuncio a pasada semana, coa que o concello tampouco pediu as axudas da biomasa do INEGA para o 2017 e que están en serio risco as de 2016 pola lentitude en executalas, tendo en conta que o 15 de outubro rematan os prazos para xustificalas “Lugo non pode seguir perdendo fondos, precisamos unha mudanza seria na xestión do noso concello”.

Lugo, 4 de agosto de 2017. O voceiro do BNG no concello de Lugo, Rubén Arroxo, denunciou unha vez máis a ausencia dunha estrutura de madeira situada na parte baixa do paseo do río Rato á altura da Tolda, que foi levada por unha riada en xaneiro de 2016 “vai ano e medio dende que o río a arrincou, é unha obra dun custo baixísimo e que fai servizo a moita xente que estes días pasa por estes parques, e malia que dende o BNG levemos todo este tempo pedindo o arranxo nada se fixo” explicou Rubén Arroxo, lembrando que non só foi pedido polo grupo municipal, senón que ata os deputados provinciais do BNG chegaron a levar esta cuestión a un pleno da Deputación de Lugo sen que aínda se resolvese. O portavoz nacionalista lamenta o pouco interese que teñen as diferentes administracións nas zonas verdes do municipio “temos o luxo de vivir nunha cidade rodeada de espazos que son unha autentica marabilla, mais a pesar disto as administracións fan moi pouco por mantelas atendidas” explicaba o concelleiro do BNG.

O portavoz do BNG tamén pediu que se limpase os dous sendeiros que unen os Parques do Miño co do Rato. A día de hoxe o sendeiro que está situado paralelo á N-VI está practicamente pechado pola maleza, causando molestias as centos de persoas que diariamente se moven pola zona nestes meses de verán, o propio concelleiro explicou que “Non é aceptable que se deixe pechar o camiño pola maleza e máis na época na que máis xente pasa pola zona, nestes momentos non é posible cruzarse dúas persoas, nun sendeiro que cando está limpo ten un ancho cómodo e seguro”. Cómpre ter en conta que é un tramo curto de en torno a 300m, “e que non supón ningún esforzo económico para a administración”.

O BNG tamén quixo lembrar a existencia dun acordo plenario de decembro do 2015 “o pleno municipal aprobou por unanimidade unha proposición do BNG para instar ás diferentes administracións que se faga un mantemento constante e un arranxo das deficiencias destes sendeiros, que son un espazo de ocio da veciñanza de Lugo, o certo é que precisamente dende que se deu este acordo, é cando menos atención se lle está a dar” explicou o portavoz nacionalista, lembrando que “de pouco serven estes espazos verdes se non se lles acometen os mantementos precisos”.    

Rubén Arroxo sinalou “non entendemos o pouco interese do goberno municipal en mellorar a xestión enerxética por sistemas máis ecolóxicos e máis económicos”

Lugo, 2 de agosto 2017. Se o BNG denunciaba publicamente o pasado luns que o concello de Lugo podía quedar por causas dunha nefasta xestión política sen unha subvención de 776.255,47 € adxudicada polo INEGA para un proxecto de rede de biomasa, no día de hoxe podemos ver na web do INEGA que o concello de Lugo non solicitou a que saíu no 2017. O portavoz do BNG no concello de Lugo, Rubén Arroxo, mostrouse bastante sorprendido ao ver o listado de beneficiarios desta axuda na que non aparece o concello lucense “non entendemos o pouco interese do goberno municipal en mellorar a xestión enerxética por sistemas máis ecolóxicos e máis económicos”. No listado que aparece na web do INEGA, publicado este 1 de agosto, pódese observar que se concederon 121 axudas a entidades locais galegas, e a ausencia de Lugo nese listado é para o BNG “unha nova oportunidade perdida de facer proxectos na cidade”

A convocatoria de axudas baixo o título de “subvencións para o ano 2017 a proxectos de biomasa para administracións locais e autonómica, entidades sen ánimo de lucro, empresas e autónomos” foi publicada no DOG do 22 de marzo do 2017 e existía un prazo ata o 24 de abril para solicitala, algo que para o BNG “é tempo máis que suficiente se se ten un proxecto do que se quere para Lugo”. Estas axudas cubrían ata un 80% da inversión, unha cantidade que o BNG considerou moi importante.

O concelleiro do BNG, Rubén Arroxo, pediu “un cambio de rumbo na xestión municipal” entendendo que a día de hoxe o goberno municipal segue sen un proxecto claro para Lugo malia levar xa máis de 2 anos de mandato. O BNG cre que proxectos coma o da biomasa, que son alternativas directas ao petróleo e que aforran cartos, deben ter maior consideración por parte do executivo local.

Axudas do 2016. Con respecto ás axudas outorgadas a Lugo o 22 de decembro do 2016, o BNG volve insistir en que dificilmente se podan ampliar os prazos, tal e como se xustificou o goberno municipal, lembrando que non hai ningún documento oficial no que apareza dita cuestión, polo que estas terían que estar xustificadas antes do 15 de outubro, algo que Rubén Arroxo volveu considerar de “moi complicado”, polo que pediu atención máxima deste asunto para evitar perder os preto de 800.000€.

Bases axudas: http://www.inega.gal/subvencions/subvencions/Energiasrenovables/2017/ficha_renovables2017_0003.html

Concedidas: http://www.inega.gal/sites/default/descargas/subvencions/SubvencionsPDF/Relacion_axudas_BiomasaFEDER2017.pdf