bng

Lugo, 1 de agosto 2017. O BNG lamentou que o escurantismo que mantivo o goberno municipal no deseño das novas liñas de autobuses urbanos, na cal non se permitiu participar á oposición, dea como resultado unha peor conexión no rural. O grupo nacionalista, que solicitou en reiteradas ocasións que se convocase unha comisión co fin de poder tratar entre todos os grupos as diferentes propostas, considera que as liñas agora propostas non son nin moito menos as mellores, sobre todo no que afecta á zona rural “non só non se amplían as liñas que conectan a zona urbana coas parroquias, senón que nalgúns casos como Muxa ou Castelo redúcense” afirmou Rubén Arroxo. O propio portavoz municipal explicou o exemplo da liña que antes pasaba por Castelo e subía ata a Ronda da Muralla, agora desviarase por Fontiñas, algo que cuestionou, posto que moita poboación da zona agora terá que cambiar de bus na propia Ronda das Fontiñas para subir ata o centro, dificultando a mobilidade especialmente para a poboación maior. Neste mesmo sentido o concelleiro tamén lamentou que non se intentase ampliar as liñas de buses no rural, posto que nas súas palabras “do outro lado do Miño, no que son as parroquias da zona oeste do concello, o servizo de transporte público é na práctica inexistente”.

O grupo nacionalista propón reunir a todos os grupos municipais e mirar que posibilidades de modificación das liñas existen, “entendemos que hai que xuntarse e falar de solucións, porque se queremos que viva xente no rural o que non se pode é seguilo deixando en estado de esquecemento e de recorte de servizos” explicaba Rubén Arroxo lembrando que estas xuntanzas se deberon ter feito antes de presentarse as novas liñas “posiblemente a alcaldesa quixo sacar en solitario o titular das novas liñas, sen ter nin tan se queira analizado se melloraban a situación anterior” afirmou o portavoz do BNG.

Recollida de sinaturas. A propia veciñanza do rural está a cuestionar estas novas rutas, nalgunhas parroquias como Castela ou Muxa comezaron a facer unha recollida de sinaturas para non perder o servizo de transporte público.

Lugo, 31 de xullo 2017. O BNG denuncia publicamente que por causas dunha nefasta xestión política o concello pode perder 776.255,47 € dunha subvención adxudicada polo INEGA, baixo o procedemento de “proxectos de redes de distribución de enerxía térmica con equipos de xeración con biomasa”, que foi publicada no DOG o pasado 22 de decembro do 2016. O Concello de Lugo, que solicitou esta subvención para levar a cabo nas instalacións deportivas do Parque da Milagrosa, e que permitirían un aforro importante a nivel económico na xeración de calor para quentar a auga das piscinas e das instalacións colindantes, pode estar a un paso de perdela. Rubén Arroxo informou que na situación actual é case imposible que se poida levar a cabo, dado que o 30 de setembro tería que estar xustificada a compra das caldeiras e o 15 de outubro a instalación da rede, e a día de hoxe nin tan se queira se sacaron a licitación, tendo en conta os prazos que un procedemento de licitación aberta coma este leva consigo. O concelleiro nacionalista afirmou que “se finalmente non se consegue executar, sería dunha xestión política nefasta, posto que o Concello de Lugo non só perdería unha subvención desta cuantía, senón que ademais seguiría a ter uns gastos nas instalacións deportivas que se poderían minimizar”.

O BNG considera que se o goberno municipal non é quen de solucionar isto, atopariámonos nunha das actuacións máis desastrosas do executivo local. Rubén Arroxo chamou ao concello local a “poñerse as pilas no asunto de forma urxente” para evitar que Lugo perda eses case 800.000 €  “isto é sinónimo de que o concello funciona a salto de mata, non só non hai proxecto de concello, senón que ata se desfai o que che dan na práctica feito”

Expediente de crédito. Unha das causas do retraso é a aprobación de crédito para poder levar adiante este proxecto. No pleno de xuño aprobáronse 258.752€ para a parte que lle corresponde ao concello, mais o goberno municipal xa debería ser consciente de que habería un período de alegacións, as cales foron presentadas, polo que poden retrasar a aprobación definitiva ao pleno ordinario do 28 de setembro, a non ser que se convoque un pleno extraordinario, situación esta que imposibilitaría de facto toda posibilidade de execución. O portavoz do BNG entende que ante unha situación coma esta, e tendo en conta que o goberno municipal era coñecedor dende o 22 de decembro da aprobación de dita subvención, podería ter levado un expediente de crédito ao pleno nos primeiros meses de ano para sacar este proxecto adiante con garantías. O portavoz do BNG afirmou “é unha neglixencia política que non se intenten iniciar as negociacións dos orzamentos ata maio, e non resolvan isto con tempo necesario”

Lugo, 28 de xullo 2017. O BNG-AA instalou un “letreiro de obra” nas Saamasas no lugar onde ten os permisos pertinentes da Confederación Hidrográfica Miño Sil e da Consellería de Medio Ambiente, no que apunta información sobre o acceso ao río anunciando que o prazo de execución de obra será en canto a Deputación de Lugo o permita “nós deixámolo claro, en canto a Deputación o permita, que é a propietaria do terreo, faremos o acceso” sinalou Rubén Arroxo. O concelleiro nacionalista critica que o PSOE estea tan empeñado en evitar que a veciñanza de Lugo teña unha zona pública no río onde bañarse, e que despois de 8 anos sen facer nada, e cunha proposta do BNG aprobada en pleno, agora siga boicoteando unha proposta do propio grupo nacionalista “temos os permisos das outras institucións, pero o PSOE utiliza a Deputación como ferramenta para evitar que poidamos instalar o acceso”.

O BNG lamentou que xa pasara un mes dende que recibiu todas as aceptacións medioambientais, e que o goberno provincial do PSOE siga impedindo o uso deses terreos “o presidente da Deputación nin tan se queira aceptou recibirnos para falar do tema, tal e como lle pedimos hai 3 semanas, é unha pataleta que ten o PSOE de poñerse totalmente en contra de que a xente de Lugo poida usar o río para o baño” afirmou o voceiro do BNG, lembrando que Lugo segue a ser un dos poucos concellos polos que pasa o Miño e que non dispón dunha zona pública para o baño.

Para o BNG a posición que ten o PSOE a respecto da zona pública de baño no Miño é a de “non facer, nin deixar facer”, engadindo ademais que se destaparon todas aquelas falacias soltadas polo propio goberno de que era imposible facer esta infraestrutura en Lugo, ao descubrir o BNG, e facelo público, que o goberno municipal nunca rematara as xestións administrativas necesarias “o PSOE vai lograr algo inaudito, impedir que unha iniciativa positiva para Lugo como é esta, e con todos os permisos aceptados, quede paralizada polos seus caprichos” explicou Rubén Arroxo.

Lugo, 26 de xullo 2017. O BNG propón instalar un parque infantil no espazo situado na Carballeira de Nadela, dende a formación nacionalista informan que as nenas e nenos que alí viven, ou van ao colexio, non teñen ningunha instalación de xogos antes de chegar a Lugo “en Nadela e na súa contorna agrúpase un importante número de nenas e nenos, polo que sería idóneo darlles un espazo de lecer” dixo Rubén Arroxo. A proposta do BNG sería a de unir neste lugar, cunhas condicións xa de por si positivas pola sombra das propias árbores, un parque infantil con algúns aparatos de exercicios para persoas adultas dentro dun parque biosaudable, “a idea é que permita un uso interxeracional do espazo, de tal forma que se acade un lugar de encontro social entre nenas e nenos con persoas adultas” dixo o concelleiro nacionalista.

O BNG entende que o rural precisa de servizos básicos e tamén de espazos de dinamización e de encontro, de aí que considere a necesidade de deseñar parques e zonas de lecer co fin de que a poboación das parroquias teña os mesmos servizos e alternativas que a xente da cidade “querer que a xente viva no rural non pode ser só un eslogan, precisamos dar servizos como o abastecemento de augas, transporte ou internet pero tamén parques e prazas nas que as persoas se poidan xuntar e poidan sentarse a falar, a facer exercicio, e que os nenos poidan xogar” dixo Arroxo. Nesta liña o BNG vén de rexistrar un iniciativa para a comisión de Medio Rural de cara a que o goberno municipal deseñe unha liña de execución destas infraestruturas de forma repartida entre diferentes parroquias do municipio.

Lugo, 21 de xullo 2017. O BNG colocou unha mesa informativa en Santo Domingo para chamar ás veciñas e veciños de Lugo a participar un ano máis na mobilización do Día da Patria Galega, que terá lugar o vindeiro martes 25 ás 12 horas dende a Alameda de Santiago de Compostela. Dende a organización nacionalista cren que a mobilización será masiva, dado que é o momento de esixir que Galiza conte “Reivindicar os nosos dereitos como pobo de forma masiva é a única vía para evitar que Galiza siga quedando atrás” dixo Rubén Arroxo. Para o BNG o exemplo do abandono do estado sobre Galiza é Lugo, cun ferrocarril do século XIX, cunhas autovías que nunca rematan, cun sector gandeiro cada día peor pagado e unha industrialización que nunca chega. Mais tamén hai moitos máis exemplos que dende a propia organización consideran que urxe esixir, como é a necesaria tarifa eléctrica galega, que permitiría reducir o custo nun 30% na factura da luz, coas conseguintes melloras na economía domestica, e cos beneficios para a instalación de industria e por tanto para a creación de postos de traballo que reducirían a emigración forzosa que está a vivir o país.  “Animamos ás veciñas e veciños de Lugo a vir o 25 a Compostela para amosar xunto a outras miles de persoas chegadas de todo o país, que temos capacidade de pelexar polo que nos corresponde” dixo Rubén Arroxo.  

Tamén nesta mesa informativa o BNG seguiu coa campaña que leva a respecto de solicitar un xulgado de violencia de xénero, a edil Maite Ferreiro sinalou que xa son moitas as persoas que asinaron esta reivindicación e que contan con poder facer entrega neste outono das sinaturas, antes do 25 de novembro, día internacional contra a violencia de xénero, co fin de que a Xunta de Galiza escoite a necesidade que teñen deste xulgado as mulleres de Lugo que foron ou poidan ser vítimas.

Lugo, 20 de xullo 2017. O BNG solicítalle a Fomento o arranxo do firme das vías de servizo da Ronda Norte, de xeito especial no entorno do polígono das Gándaras. O seu portavoz, Rubén Arroxo explicou que o pavimento da estrada que sae directamente dende dito polígono cara Albeiros está nunha situación de abandono absoluto polo que causa molestias ás persoas que por alí circulan. O propio edil dixo que esa ruta incrementou de forma considerable o tráfico de vehículos nos últimos anos, dado que une directamente a rúa Montefaro co polígono, sendo o percorrido máis curto para chegar á parte central da avenida da Coruña “estas vías son usadas por un importante número de vehículos diarios, porén o estado é deplorable”.

Dende o BNG afirmaron que xa hai anos que algúns veciños presentaron queixas por esta cuestión, malia todo a situación non mudou o máis mínimo “recibimos en varias ocasións queixas de veciños de Lugo que pasan por aí diariamente e xa non saben que facer para que arranxen o firme, polo que non conciben que unha obra relativamente pequena, como é esta, leve tanto tempo atascada no tempo”.  O propio concelleiro explicaba que resulta incoherente intentar promover que haxa empresas nos polígonos e que despois as propias institucións non sexan quen de darlle un mantemento acaído aos seus accesos.

Lugo, 19 de xullo 2017. O parque situado xunto ao Pazo de Feiras e Congresos, e que o mantemento está a ser levado polo Concello de Lugo, está a ser cuestionado por moitas veciñas e veciños polos síntomas de abandono que amosa. Nestas datas de verán son moitas as persoas que se achegan a este parque e que lamentan o seu estado “chegan queixas sobre a acumulación de lixo, pero sobre todo a xente critica que a día de hoxe non se repararan aínda elementos danados de grandes dimensións como as pérgolas sobres as mesas” afirmou Rubén Arroxo, lembrando que algunha desas pérgolas leva tempo totalmente inclinada e en calquera momento podería incluso causar algún accidente. Outra das cuestións que os paseantes na zona consideran que se deberían facer é a limpeza dos bancos “algúns bancos levan con verdín anos, e sería tan simple como un lavado con auga a presión” dixo o concelleiro nacionalista.

Tamén nesta zona o BNG recibiu queixas de persoas usuarias do parque infantil, dado que moitos domingos pola mañá aparecen restos de botellón no lugar de ocio das nenas e nenos, sen que se lle faga nada ao respecto.

O BNG lamenta o pouco interese que hai en Lugo por coidar os espazos do entorno fluvial “temos o luxo de vivir nunha cidade rodeada dunhas zonas verdes envexables, pero non somos quen de mantelas nun estado digno, polo que algo falla”. Nesta liña dende a organización nacionalista tamén quixeron lembrar que outro dos espazos moi utilizados, o sendeiro que une os parques do Miño e do Rato, está a piques de pecharse pola maleza.

O BNG-AA levará ao pleno da corporación municipal unha iniciativa para que o proxecto prevea a cociña  e a Xunta asuma as súas competencias en relación aos comedores escolares

Lugo, 17 de xullo 2017. O BNG-AA levará ao vindeiro pleno do concello de Lugo unha iniciativa para reclamar que a Xunta de Galiza prevea no proxecto de novo colexio para o Sagrado Corazón da execución dunha cociña propia, co fin de evitar as problemáticas que se deron nos últimos tempos a respecto dos comedores escolares, e garantir que este novo colexio conte cun servizo de comedor de xestión directa por parte da propia Consellería “Agora que se vai comezar co proxecto do colexio é o momento de lembrar estas cuestións para facer as cousas ben e evitar os problemas futuros” afirmou a edil Maite Ferreiro, que tamén lembrou que a día de hoxe nos comedores xestionados pola Xunta págase o comedor en función da renda e nos de xestión municipal páganse 5 € indeferentemente da situación económica familiar. Ante isto o BNG levará ao pleno municipal unha proposición co fin de acadar o acordo da corporación para instar á Xunta a que teña en conta esta cuestión.

O BNG entende o servizo de comedores xestionado pola Xunta como unha actividade máis que deberían ter todos os centros, co fin de mellorar a conciliación familiar e evitar agravios entre os diferentes colexios. A concelleira nacionalista lembrou que “O Decreto 132/2013, do 1 de agosto regula o funcionamento dos comedores escolares nos centros docentes públicos non universitarios, dependentes da Consellería con competencia en materia de educación. Este decreto configura o comedor escolar como un recurso educativo de carácter complementario, compensatorio e social, especialmente destinado a garantir a efectividade da educación  básica obrigatoria dentro dos principios de igualdade e solidariedade”. Para o BNG o servizo de comedor escolar foi feito no seu día para dar resposta á situación de desvantaxe social e económica de moitas familias asentadas en núcleos illados e diseminados, porén, nestes intres, o  servizo de comedor escolar vai máis alá, debido aos cambios socioeconómicos e ó aumento da demanda de medidas concretas en materia de conciliación da vida familiar e laboral.

A Festa da Patría enmarcase nunha serie de actos previos á celebración do 25 de xullo que se están a desenvolver en todas as comarcas do país

 “Chama a atención que o PSOE critique o permiso concedido ao BNG, eles foron incapaces de facer nada en 8 anos e a realidade é que Lugo segue sen zona de baño” dixo Arroxo